Ўзбекистон ТИВ Хитойда бўлиб турган ва у ерга боришни режалаштираётган фуқароларга огоҳлантириш билан чиқди.
Вазирлик хабарида айтилишича, сўнгги кунларда Хитойнинг турли ҳудудларида, жумладан, Пекин шаҳри аҳолиси ўртасида COVID-19 коронавирус инфекцияси билан касалланганлар сони ортаётгани сабабли Ўзбекистоннинг Хитойдаги элчихонаси фуқароларни бир неча жиҳатларга эътибор қаратишни сўради.
Қайд этилишича, 2021 йил 19 январдан эътиборан хорижий мамлакатлардан пойтахт Пекинга келадиганлар соғлигини назоратга олиш учун карантин муддати 28 кунгача узайтирилди. Хориждан Хитойнинг бошқа шаҳарлари орқали Пекинга кирмоқчи бўлганлар пойтахтга киришдан олдин ўша шаҳарларда 21 кун карантинда бўлади. Пекинга етиб келгач, уларнинг саломатлиги 7 кун давомида яна кузатувга олинади.
Хитойдан Ўзбекистонга қайтиш истагида бўлган ватандошларга Сиан—Тошкент—Сиан йўналишида чартер ҳаво қатновларини амалга ошираётган Хитой авиакомпанияси хизматларидан фойдаланиши тавсия этилади. Талабалик гувоҳномасини тақдим этган талабалар учун авиачипта харид қилишда чегирма мавжуд.
Ўзбекистон фуқаролари Хитойдан Сеул шаҳрига (Жанубий Корея пойтахти) етиб олиши ва аэропорт транзит ҳудудидан чиқмаган ҳолда ҳафтанинг ҳар жума куни Uzbekistan Airways амалга ошираётган Тошкент—Сеул—Тошкент йўналишидаги рейслар орқали ватанга қайтишлари мумкин.
Ўзбекистонга қайтган ва ўқишни/меҳнат фаолиятини давом эттириш мақсадида Хитойга қайтишни режалаштираётган ватандошларга таълим муассасаси/иш берувчи билан боғланиб, ўзларининг Хитойга қайтишлари бўйича маслаҳатлашиб олиш тавсия этилган.
Аввалроқ Ўзбекистон ТИВ Қирғизистонга борувчи фуқароларни мамлакатга киришда қўшимча талаблар қўйилгани сабаб огоҳлантирганди.
Изоҳ (0)