Prezidentlik vakolati 20-yanvar kuni yakunlanadigan AQShning amaldagi prezidenti Donald Tramp o‘z tarafdorlari bilan yangi siyosiy partiya tuzish imkoniyatini muhokama qildi. Bu haqda The Wall Street Journal (WSJ) gazetasiga tayanib, “RBK” xabar berdi.
Ta’kidlanishicha, Tramp o‘z birlashmasini Vatanparvarlik partiyasi deb atashni xohlagan.
Ma’lumotlarga ko‘ra, so‘nggi kunlarda AQSh prezidenti partiyadoshlari, xususan, respublikachilarning senatdagi yetakchisi Mitch Makkonnell bilan qarama-qarshi fikrga borib qolgan. O‘tgan kuni u Trampni Vashingtonda 6-yanvar kuni sodir bo‘lgan tartibsizliklarni yuzaga keltirishda ayblagan edi.
Hozircha Tramp yetarli darajada vaqt va resurs talab qiladigan yangi partiyani yaratishga qanchalik ahd qilgani noma’lum. Gazetaning yozishicha, lavozimidan ketayotgan prezidentning ko‘plab tarafdorlari mavjud va ularning bir qismi Tramp 2016-yilda hokimiyatga kelmaguniga qadar Respublikachilar partiyasining siyosatiga qiziqmagan.
“‘Uchinchi’ partiyalar (Respublikachilar va Demokratlardan tashqari nisbatan yirik siyosiy birlashmalar) odatda saylovlarda muhim rolni o‘ynash uchun yetarlicha qo‘llab-quvvatlovga ega bo‘lmaydi. Shu sababli yangi partiya tuzishga bo‘lgan har qanday urinish, respublikachilar tomonidan qarshilikka duch keladi”, — deyiladi xabarda.
Avvalroq Tramp Baydenning inauguratsiyasidan bir kun avval koronavirus tufayli AQShga kirishga qo‘yilgan taqiqni bekor qilgani hamda o‘zining so‘nggi ish kunida u yuzga yaqin kishini afv etishni ham rejalashtirgani haqida xabar berilgandi.
Izoh (0)