Президентлик ваколати 20 январь куни якунланадиган АҚШнинг амалдаги президенти Дональд Трамп ўз тарафдорлари билан янги сиёсий партия тузиш имкониятини муҳокама қилди. Бу ҳақда The Wall Street Journal (WSJ) газетасига таяниб, «РБК» хабар берди.
Таъкидланишича, Трамп ўз бирлашмасини Ватанпарварлик партияси деб аташни хоҳлаган.
Маълумотларга кўра, сўнгги кунларда АҚШ президенти партиядошлари, хусусан, республикачиларнинг сенатдаги етакчиси Митч Макконнелл билан қарама-қарши фикрга бориб қолган. Ўтган куни у Трампни Вашингтонда 6 январь куни содир бўлган тартибсизликларни юзага келтиришда айблаган эди.
Ҳозирча Трамп етарли даражада вақт ва ресурс талаб қиладиган янги партияни яратишга қанчалик аҳд қилгани номаълум. Газетанинг ёзишича, лавозимидан кетаётган президентнинг кўплаб тарафдорлари мавжуд ва уларнинг бир қисми Трамп 2016 йилда ҳокимиятга келмагунига қадар Республикачилар партиясининг сиёсатига қизиқмаган.
«‘Учинчи’ партиялар (Республикачилар ва Демократлардан ташқари нисбатан йирик сиёсий бирлашмалар) одатда сайловларда муҳим ролни ўйнаш учун етарлича қўллаб-қувватловга эга бўлмайди. Шу сабабли янги партия тузишга бўлган ҳар қандай уриниш, республикачилар томонидан қаршиликка дуч келади», — дейилади хабарда.
Аввалроқ Трамп Байденнинг инаугурациясидан бир кун аввал коронавирус туфайли АҚШга киришга қўйилган тақиқни бекор қилгани ҳамда ўзининг сўнгги иш кунида у юзга яқин кишини афв этишни ҳам режалаштиргани ҳақида хабар берилганди.
Изоҳ (0)