AQShning amaldagi prezidenti Donald Tramp 73 kishini afv etdi, shuningdek, yana 70 kishining jazolari yengillashtirilgan. Bu haqda Oq uy saytiga tayanib “Kommersant” xabar berdi. Afv etilganlar orasida prezidentning sobiq maslahatchisi Stiven Bennon ham bor. U va yana bir necha kishi Meksika bilan chegarada qurilayotgan devorlarga xayriya qilingan mablag‘lardan 25 million dollarni talon-toroj qilganlikda ayblangan.
Bundan tashqari, afv etilganlar qatorida rossiyalik Mariya Butina bilan ishqiy munosabatda bo‘lgan Respublikachilar partiyasining siyosiy konsultanti Pol Erikson va Donald Trampning tarafdori, tadbirkor Elliott Broydi ham bor.
Donald Tramp afv etilganlar qatoriga o‘zini, oilasi va advokati Rud Julianini qo‘shmagan. Shuningdek, afv etilganlar orasida WikiLeaks asoschisi Julian Assanj va Milliy xavfsizlik agentligi hamda Markaziy razvedka boshqarmasining sobiq xodimi Edvard Snouden yo‘q.
Avvalroq Tramp Baydenning inauguratsiyasidan bir kun avval koronavirus tufayli AQShga kirishga qo‘yilgan taqiqni bekor qilgani hamda o‘zining so‘nggi ish kunida u yuzga yaqin kishini afv etishni ham rejalashtirgani haqida xabar berilgandi.
20-yanvar kuni Toshkent vaqti bilan soat 22:00 da AQShning navbatdagi prezidenti — Jo Baydenning inauguratsiyasi bo‘lib o‘tadi. Tramp ushbu marosimda xayrlashuv murojaati bilan chiqish qiladi.
Izoh (0)