Qashqadaryo viloyati hokimi Zoir Mirzayev o‘zining ikki nafar farzandidan tashqari yana olti nafar yetim bolaga mehr berib kelayotgan kosonlik ayolga 30 million so‘m moddiy yordam ko‘rsatilishini ma’lum qildi. Bu haqda viloyat hokimligi axborot xizmati xabar berdi.
Ta’kidlanishicha, Zoir Mirzayev 19-yanvar kuni viloyatning Koson tumanida fuqarolar uchun qabul o‘tkazgan.
Viloyat hokimi qabuliga kelgan Mahbuba Mo‘minova o‘zining ikki nafar farzandidan tashqari yana olti nafar begona bolaga ham onalik mehrini berib, ularni katta qilayotganini aytib, ayni kunda muammolarga duch kelganini bildirgan. Fuqaro murojaatini tinglagan Zoir Mirzayev unga “Mahalla” xayriya jamoat fondi tomonidan 30 million so‘m mablag‘ ajratilishini ma’lum qilgan. Shuningdek, o‘z hisobidan farzandlariga kiyim-bosh olib berishini va’da qilgan.
Koson tumani hokimligi axborot xizmati rahbari Dilshod Nabiyevning qo‘shimcha qilishicha, oilani tuman hokimi Asrol Boyqarayev ham doimiy otaliqqa olgan.
“Karantin davri boshlanganidan buyon ‘Saxovat va ko‘mak’ jamg‘armasi hisobidan oilaga doimiy ravishda oziq-ovqat mahsulotlari yetkazib berilgan. Shuningdek, savobtalab tadbirkor R.Umarov homiyligida oilaga sigir va buzoq berilgan”, — deydi Dilshod Nabiyev.
Mavzuga doir:
- Prezident maslahatchisi Zoir Mirzayevga “A’lo xizmatlari uchun” ko‘krak nishonini topshirdi
- Zoir Mirzayev Qashqadaryodagi hokimlarning elchilar bilan muloqot qilmayotganini tanqid qildi
- “U yo saviyasiz, yoki savollardan qo‘rqadi”. Zoir Mirzayev Qarshi tumanida aholiga hokimsiz murojaatnoma yo‘llanganini tanqid qildi
Izoh (0)