Toshkent shahrida mavjud muammolarni bartaraf etish uchun har bir mahalla fuqarolar yig‘iniga 50 million so‘mdan mablag‘ ajratiladi. Bu haqda 19-yanvar kuni bo‘lib o‘tgan Xalq deputatlari Toshkent shahar kengashining o‘ttiz birinchi sessiyasida Toshkent shahar hokimi Jahongir Ortiqxo‘jayev aytib o‘tdi.
Sessiya ishida ma’lum qilinishicha, mahallani namunaviy holatga keltirish kabi yo‘nalishlarida Toshkent shahrida eng yaxshi mahalla raislarini tanlab olish uchun nizom ishlab chiqilgan. Nizomga asosan namunaviy deb topilgan 50 ta eng yaxshi mahalla raisining har biriga homiylar tomonidan ajratilayotgan 50 ta Spark avtomobili O‘zbekiston Respublikasining Mustaqillik bayrami arafasida topshiriladi. G‘oliblar 30-avgust kuni e’lon qilinadi.
Jahongir Ortiqxo‘jayevning aytib o‘tishicha, mavjud muammolarni bartaraf etish uchun poytaxtdagi 519 ta mahalla fuqarolar yig‘inlarining har biriga 50 million so‘mdan – qariyb 26 milliard so‘m ajratiladi.
“Xalqqa foydasi teggan, fuqarolarning yashash sifatini ozgina bo‘lsa-da o‘zgartirishga hissasini qo‘shgan, fuqarolarning dardi bilan yashagan, mahallasini eng namunali qilgan mahalla raislarining o‘ntadan bittasiga aholining roziligi bilan Spark avtomobili taqdim etiladi”, – dedi poytaxt hokimi.
Uning qo‘shimcha qilishicha, yutuq uchun berilgan avtomobil ishchi mashinasi emas.
“Xohlasa haydaydi, xohlasa sotib yuboradi, xohlasa nevaralariga beradi. Bu vaqtinchalik mashina emas – bu sovg‘a. Lekin buning uchun juda katta faol xizmat qilish kerak bo‘ladi. Menimcha, mahallaga biroz jon kiradi, mahallada biroz qon aylanadi. Mahalla fuqarolar raislari ham bunga befarq bo‘lmaydi. O‘zining faol xizmatlarini qilishadi, deb o‘ylayman”, – dedi Jahongir Ortiqxo‘jayev.
Avvalroq Jahongir Ortiqxo‘jayev deputatlar 2020-yil budjetdan ortib qolgan pullarni talabalar yotoqxonasi uchun sarflashni aktual masala deb hisoblamaganliklarini aytib o‘tgan edi.
Izoh (0)