Қашқадарё вилояти ҳокими Зоир Мирзаев ўзининг икки нафар фарзандидан ташқари яна олти нафар етим болага меҳр бериб келаётган косонлик аёлга 30 миллион сўм моддий ёрдам кўрсатилишини маълум қилди. Бу ҳақда вилоят ҳокимлиги ахборот хизмати хабар берди.
Таъкидланишича, Зоир Мирзаев 19 январь куни вилоятнинг Косон туманида фуқаролар учун қабул ўтказган.
Вилоят ҳокими қабулига келган Маҳбуба Мўминова ўзининг икки нафар фарзандидан ташқари яна олти нафар бегона болага ҳам оналик меҳрини бериб, уларни катта қилаётганини айтиб, айни кунда муаммоларга дуч келганини билдирган. Фуқаро мурожаатини тинглаган Зоир Мирзаев унга «Маҳалла» хайрия жамоат фонди томонидан 30 миллион сўм маблағ ажратилишини маълум қилган. Шунингдек, ўз ҳисобидан фарзандларига кийим-бош олиб беришини ваъда қилган.
Косон тумани ҳокимлиги ахборот хизмати раҳбари Дилшод Набиевнинг қўшимча қилишича, оилани туман ҳокими Асрол Бойқараев ҳам доимий оталиққа олган.
«Карантин даври бошланганидан буён ‘Саховат ва кўмак’ жамғармаси ҳисобидан оилага доимий равишда озиқ-овқат маҳсулотлари етказиб берилган. Шунингдек, савобталаб тадбиркор Р.Умаров ҳомийлигида оилага сигир ва бузоқ берилган», — дейди Дилшод Набиев.
Мавзуга доир:
Изоҳ (0)