Ijtimoiy tarmoqlarda Jur’at Tadjiyevning “Xorazm hududiy elektr tarmoqlari” AJ direktori Muratbay Bazarimbetovga nisbatan qo‘zg‘atilgan jinoyat ishi bo‘yicha videomurojaati tarqaldi. Video yuzasidan Bosh prokuratura munosabat bildirdi.
Ta’kidlanishicha, 2020-yil 24-dekabr kuni O‘zbekiston Bosh prokuraturasi huzuridagi IJQK departamenti viloyati boshqarmasi tomonidan Xorazm viloyat “Hududiy elektr tarmoqlari” AJ bosh direktori Bazarimbetov Muratbay Allambergenovich va boshqalarga nisbatan Jinoyat kodeksining 210-moddasi 3-qismi “a” bandi (juda ko‘p miqdorda pora olish) bilan jinoyat ishi qo‘zg‘atilgan.
Mazkur jinoyat ishini qo‘zg‘atilishiga, “Hududiy elektr tarmoqlari” AJ bosh direktori M.Bazarimbetov Tuproqqal’a tumani hududida yangidan tashkil qilinayotgan “Best Azia Metan” MChJga o‘rnatiladigan 630 kilovattlik transformator punktini 6–10 kilovattlik elektr liniyasiga yaqin tayanchdan 6500 kilovattga ulab berishda amaliy yordam berishi evaziga 15 000 AQSh dollarini o‘z xizmat xonasida tamagirlik yo‘li bilan pora tariqasida olganligi asos bo‘lgan.
Hozirda ushbu jinoyat ishining dastlabki tergov harakatlari Xorazm viloyat prokuraturasi uyushgan jinoyatchilik va korrupsiyaga qarshi kurashish bo‘limi tomonidan olib borilmoqda.
Jinoyat ishi bo‘yicha, M.Bazarimbetovga nisbatan 2020-yil 25-dekabrda Jinoyat kodeksining 210-moddasi 3-qismi “a” bandi (juda ko‘p miqdorda pora olish) bilan ayblov e’lon qilingan. Shuningdek, Jinoyat ishlari bo‘yicha Urganch shahar sudining 2020-yil 25-dekabrdagi ajrimiga asosan M.Bazarimbetovga nisbatan qamoqqa olish tarzidagi ehtiyot chorasi qo‘llanilgan.
Shu sababli M.Bazarimbetov hozirda Xorazm viloyat IIB 11-sonli tergov hibsxonasida saqlanmoqda.
Eslatib o‘tamiz, Muratbay Bazarimbetov 15 ming AQSh dollari bilan qo‘lga olingani 8-yanvar kuni ma’lum bo‘lgan edi.
Avvalroq Andijonda sanoat zonasidan yer olib berishni va’da qilib, pora olgan sobiq kadastr xodimi, Buxoroda yer ajratish evaziga fuqarodan 2 ming dollar pora olgan hokimlik mas’uli hamda Samarqandda aybini yashirish evaziga IIB xodimiga 100 dollar pora bergan fuqaro qo‘lga olingani haqida xabar berilgandi.
Izoh (0)