Oliy Majlis Qonunchilik palatasi deputati Rasul Kusherbayev fuqarolardan kelayotgan murojaatlarning aksariyati sud faoliyati va qarorlaridan norozilik bilan bog‘liq ekanligini aytib, Oliy sud vakillarining fuqarolar uchun qabul eshiklarini yopib olganini tanqid qilgandi. Oliy sud matbuot xizmati muhokamaga sabab bo‘lgan ushbu masalaga munosabat bildirdi.
Qayd etilishicha, mamlakatda karantin choralari kuchaytirilgan kezlarda Oliy sud Rayosatining 2020-yil 20-martdagi qaroriga asosan, sudlarda fuqarolarning shaxsiy qabuli, shu jumladan, Oliy sud raisi va rais o‘rinbosarlari qabuli maxsus buyruq chiqqunga qadar to‘xtatib turilgan.
Ammo shikoyat hamda arizalar elektron shaklda info@supcourt.uz pochta manzili orqali qabul qilish, ularning amaldagi qonunchilikka muvofiq ko‘rib chiqilib, qonuniy hal etish choralari ko‘rilgan. Sudlarga elektron murojaatlar, shuningdek, Oliy sud rahbariyati qabuliga elektron ro‘yxatdan o‘tish Oliy sudning interaktiv xizmatlari portali my.sud.uz orqali ham amalga oshirilgan.
“Binobarin, Oliy sud rahbariyati tomonidan fuqarolarning qabuli mutlaqo amalga oshirilmadi, degan iddaolar asossiz”, — deyiladi munosabatda qator statistik ma’lumotlar keltirilgan.
Unga ko‘ra,
- 2020-yil mobaynida Oliy sud rahbariyati tomonidan jami 5 896 nafar fuqaro qabul qilingan. Ularning 1 876 nafari bevosita Oliy sudda, 3846 nafari sayyor qabullarda, 174 nafari videokonferensaloqa tizimi yordamida qabul qilingan.
- Shuningdek, 2020-yil mobaynida Oliy sud raisi tomonidan 341 nafar (bevosita Oliy sudda 254 nafar, videokonferensaloqa tizimi orqali esa 87 nafar) fuqaro qabul qilingan.
- Oliy sud raisining birinchi o‘rinbosari Robaxon Mahmudova tomonidan 2020-yil mobaynida 428 nafar (bevosita Oliy sudda 28, sayyor qabullarda 392 nafar, videokonferensaloqa tizimi orqali 8 nafar) fuqaro qabul qilingan.
- Oliy sud raisining o‘rinbosari Ikrom Muslimov tomonidan 1 472 nafar (bevosita Oliy sudda 685, sayyor qabullarda 775 nafar, videokonferensaloqa tizimi orqali 12 nafar) fuqaro qabul qilingan.
- Oliy sud raisining o‘rinbosari Baxtiyor Isakov tomonidan esa 2 416 nafar (bevosita Oliy sudda 113, sayyor qabullarda 2 303 nafar) fuqaro qabul qilingan.
- 2020-yil 4-choragida Oliy sud qabulxonasiga tashrif buyurgan 631 nafar fuqaroning ariza va shikoyatlari qabul qilib olingan va ushbu murojaatlarning qonuniy hal etilishi ta’minlangan.
Bildirilishicha, mazkur tartibga asosan, har bir sudya mustaqil ekanligi nuqtayi nazaridan xolislikni ta’minlash maqsadida Oliy sud raisining qabuliga rais o‘rinbosarining qabulidan keyin (rais o‘rinbosarining javob xatidan norozi bo‘lgan taqdirda) o‘rinbosarlar qabuliga tegishli sudlov xay’atlari tomonidan chiqarilgan qarordan norozi bo‘lgan fuqarolarning kirishlari belgilangan.
“Ushbu tartibdan bexabar ayrim fuqarolar o‘rtasida ba’zan tushunmovchiliklar yuzaga kelishi tabiiy, albatta. Bunday noroziliklarni ijtimoiy tarmoqlarda zudlik bilan tarqatib yuborish orqali keng jamoatchilik o‘rtasida sudlarga nisbatan salbiy fikrlar yuzaga kelayotganidan ham ko‘z yumolmaymiz”, — deyiladi munosabatda.
Shuningdek, pandemiya munosabati bilan Oliy sud rahbariyati tomonidan fuqarolar qabulini to‘laqonli amalga oshirish imkoniyati bo‘lmaganligi, o‘z navbatida, ayni shu murakkab vaziyat sababli ba’zi fuqarolarga sudga murojaat qilishi uchun noqulay vaziyat yuzaga kelganligini inkor etib bo‘lmasligi ta’kidlangan.
“Bugungi kunda Oliy sud rahbariyati, umuman aytganda, sudlarda fuqarolarning qabuli belgilangan tartibda va karantin qoidalarga to‘liq rioya qilingan holda amalga oshirilmoqda”, — deya yakunlangan Oliy sud munosabati.
Izoh (0)