Samarqand viloyat IIB YHXB inspektorlari 2020-yilda 317 945 ta qoidabuzarlikni aniqlagan. Bu haqda “Daryo”ga viloyat YXHB boshlig‘i o‘rinbosari Abdunabi To‘rayev ma’lum qildi.
Ta’kidlanishicha, viloyatda o‘tkazilgan reyd tadbirlarida YPX xodimlari 103 660 ta qo‘pol qoidabuzarlikni aniqlagan bo‘lsa, shundan 4506 ta holatda mast haydovchilar, 6047 ta holatda telefondan foydalanayotgan haydovchilar hamda 12 582 ta holatda piyodalar qoidabuzarliklari aniqlangan.
Shuningdek, viloyat hududidan o‘tuvchi xalqaro va davlat ahamiyatidagi avtomobil yo‘llarida o‘rnatilgan onlayn rejimida ishlovchi jami 23 ta radarlar yordamida 92 116 ta qoidabuzarlik aniqlangan.
Qo‘shimcha qilinishicha, 2020-yilning 21-noyabr kunidan boshlab Samarqand shahrining serqatnov ko‘chalari va chorrahalarida tirbandliklarning oldini olish maqsadida Mirzo Ulug‘bek, Spitamenshoh, Dahbed, Rudakiy ko‘chalari chorrahasiga hamda Narpay tumani hududiga 3.27 yo‘l belgisi ta’sir zonasida to‘xtash va to‘xtab turish qoidalarini buzgan transport vositalarini aniqlovchi “Parkon” dasturi asosida ishlovchi 6 ta videokuzatuv kameralari o‘rnatilgan. 2021-yil 6-yanvar kuniga qadar ushbu qurilma orqali 3802 ta qoidabuzarlik aniqlangan.
Avvalroq Samarqand viloyati hududida 2020-yil sodir etilgan yo‘l-transport hodisalari soni 2019-yilga nisbatan 64 taga kamaygani, shuningdek, YTHlarning 235 tasi tezlik oqibatida sodir bo‘lgani tahlil qilingandi.
Izoh (0)