Namanganda “Ayol dunyo bezagi, mehr-muhabbat ramzi” shiori ostida ayollar festivali bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Festival Davlatobod tumanidagi “Yosh kuch” stadionida sport-musiqa mashg‘ulotlaridan iborat fleshmobdan boshlandi.
Shu yerning o‘zida Qizil yarim oy jamiyati viloyat tashkiloti volontyorlari boshqaruvidagi 40 ta Damas avtomobili Namangan shahri va Davlatobod tumanidagi 40 ta mahallaga yo‘l oldi. Avtokarvon ushbu mahallalardagi 200 ta xonadonga sanitariya-gigiyena vositalari, tibbiyot aptechkalari va 500 ming so‘mdan pul yetkazdi.
Namangan shahri va Davlatbod tumani FHDYo bo‘limlarida viloyat adliya va davlat xizmatlari agentligi boshqarmalari tomonidan sayyor qabullar tashkil etildi. Advokatlar, notariuslar, sudyalar, nodavlat-notijorat tashkilotlari vakillari, davlat xizmatlari markazi xodimlari xotin-qizlarga huquqiy maslahatlar berdi.
Ayollar festivali doirasida Namangan shahridagi 8 ta maktabda xotin-qizlar uchun tibbiy ko‘riklar tashkil qilindi. Mobil poliklinika, ko‘chma rentgent qurilmasi, ultratovush tekshiruvi, laboratoriya va EKG xizmatlari ularning ixtiyorida bo‘ldi.
Maktablar sport zali poliklinika tusini oldi. O‘nlab tor soha mutaxassislari — akusher-ginekolog, jarroh, endokrinolog, kardiolog, nevropotolog, okkulist, onkolog, revmatolog, gematologlar yuzlab ayollar va ularning farzandlarini qabul qildi.
Kasalligi aniqlangan xotin-qizlar alohida ro‘yxatga olindi. Viloyatdagi bir qator nodavlat tibbiyot muassasalari ularni bepul davolash istagini bildirdi.
Namangan shahridagi musiqa va san’at maktabida keng ko‘lamli saxovat tadbiri tashkillandi. Mazkur tadbir davomida “Ayollar daftari”ga kiritilgan va “Mehr-3” operatsiyasi davomida mamlakatga qaytarib olib kelingan xotin-qizlarga 10 ta nogironlik aravachasi, 10 ta muzlatgich, 50 ta mikroto‘lqinli pech, 50 ta changyutgich va 70 ta tikuv mashinasi taqdim etildi.
Shuningdek, 5 nafar ayolning uyi bepul ta’mirlab beriladigan va yana shuncha ayolning bir yillik ijara puli to‘lab beriladigan bo‘ldi.
Oliy ta’lim muassasalarida ta’lim olayotgan 10 nafar qizning bir yillik to‘lov-shartnomasi uchun 35 million so‘m, 15 nafar texnikum talabasining yillik to‘lov-shartnomasi uchun esa 63 million so‘m, jami 98 million so‘m ajratildi.
— Ayollarimizga qancha ko‘p e’tibor bersak, shuncha kam. Biz ularning muammo va tashvishlari, ehtiyojlarini uyma-uy yurib aniqlayapmiz. Bugungi tadbirni ham mana shu o‘rganishlar natijasi sifatida qabul qilish mumkin, — deya ta’kidladi viloyat hokimi Shavkatjon Abdurazzaqov.
Namangan shahrida ayollar va yoshlar daftariga kiritilgan ishsiz fuqarolar bandligini ta’minlash maqsadida bo‘sh ish o‘rinlari “Mehnat yarmarkasi” ham tashkil etildi. Unda tikuvchilik kasbiga o‘qib, sertifikat olgan, yarmarka doirasida “Tikuvchi ayollar” kooperativiga ishga kirgan 110 nafar ayolga subsidiya shartlari asosida tikuv mashinalari taqdim etildi. Ularga uy sharoitida daromad topishlari uchun mahsulotlar yetkazib beriladigan bo‘ldi.
Ayollar festivali doirasida Namangan shahridagi Yoshlar markazida modalar namoyishi ham bo‘lib o‘tdi. Unda namanganlik iste’dodli dizaynerlarning milliy va zamonaviy liboslari namoyish etildi.
Shu yerning o‘zida o‘quv markazi rahbarlariga ayollar daftariga kirgan xotin-qizlarga kasb-hunar o‘rgatishlari uchun 5 mln so‘mdan 10 mln so‘mgacha bo‘lgan sertifikatlar topshirildi. Buning natijasida ijtimoiy himoyaga muhtoj ayollar ushbu o‘quv markazlarida bepul kasb-hunar o‘rganish imkoniyatiga ega bo‘ladi.
Ayollar festivali viloyat madaniyat saroyidagi gala-konsert bilan yakunlandi. Unda O‘zbekiston xalq artistlari Zulayho Boyxonova va Abduhoshim Ismoilov, viloyat san’atkorlari va ijrochi yoshlarning konsert dasturi namoyish etildi.
Festival yakunlariga bag‘ishlangan matbuot anjumanida ta’kidlanishicha, festival Namangandagi 22 ta manzilda o‘tkazildi hamda tadbirlar davomida ayollar daftariga kiritilgan 1,5 ming nafardan ortiq xotin-qizning muammolariga yechim topishga muvaffaq bo‘lindi.
Izoh (0)