Koronavirusning yengil shakliga chalingan bemorlar (kasalxonaga yotmagan) virusni yuqtirib olganidan keyin bir necha oy davomida uning ma’lum belgilarini o‘zida sezmoqda va parvarishga muhtoj bo‘lib qolyapti. Bu haqda Belgiya va Niderlandiya olimlari guruhi tomonidan o‘tkazilgan tadqiqot natijalariga tayanib, “RBK” xabar berdi.
Tadqiqotda koronavirusning yengil shaklidan tuzalgan 1837 kishi ishtirok etdi. Olimlar ularning infeksiyadan keyin qayta tiklanish jarayonlari va sur’atini tadqiq qilgan. Aniqlanishicha, tadqiqot ishtirokchilarining juda kam qismi (7,7 foiz) kasallikka chalinguniga qadar kundalik yumushlarida o‘zgalar yordamiga muhtoj bo‘lgan. Ammo infeksiya belgilari aniqlanganidan o‘rtacha 79 kundan so‘ng, ushbu talab sezilarli darajada oshgan (52,4 foiz). Tadqiqot ishtirokchilarining 30 foizdan ortig‘i parvarishga muhtoj deya tan olingan.
Olimlarning so‘zlariga ko‘ra, tadqiqotda ishtirok etganlar uzoq vaqtda charchoq (98 foiz), mushaklar kuchsizligi (90 foiz), uyquning buzilishi (88 foiz) va og‘riqlarni (87 foiz) his qilgan.
Tadqiqot mualliflari agarda kasallik belgilari 12 haftadan ortiqroq saqlanib qolsa, koronavirusni surunkali deb atash taklifini bildirgan.
Tadqiqotchilar koronavirus kasalligining yengil shakli bilan og‘rigan bemorlarga katta ta’sir ko‘rsatadi degan xulosaga kelgan.
“Belgilar boshlanganidan taxminan uch oy o‘tgach, kasalxonaga yotqizilmagan bemorlarning katta qismi ma’lum darajada shaxsiy parvarish uchun boshqalarga bog‘lanib qolgan. Bu COVID-19’ning bemorlar kundalik hayotiga ta’siri juda katta ekanini va bemorlarning mustaqilligini tiklash uchun davolash strategiyasini aniqlashga ko‘proq e’tibor qaratish lozimligini ko‘rsatadi”, — deydi olimlar.
Avvalroq AQShdagi turli tadqiqot markazlari olimlari kasallik insonning butun organizmiga ta’sir ko‘rsatishi va salbiy oqibatlar yana uzoq yil saqlanib qolishini ma’lum qilgandi.
Izoh (0)