Ilon Mask dunyodagi eng boy odamga aylandi

Tesla bosh direktori Ilon Mask Jeff Bezosni ortda qoldirib dunyodagi eng boy biznesmenga aylandi, deb xabar bermoqda Meduza.

Mask elektromobillar ishlab chiqaruvchi kompaniya aksiyalarining o‘sishi natijasida dunyo boylari mablag‘larini onlayn tarzda kuzatib turuvchi Bloomberg Billionaires Index’da birinchi o‘rinni egalladi.

Bloomberg uning boyligini 188,5 milliard dollarga baholagan. Bu ko‘rsatkich Bezosning boyligidan 1,5 milliardga ko‘p.

Ilon Mask CNBC telekanali hisobiga ko‘ra ham dunyoning eng boy odamiga aylandi. Telekanal uning boyligini 184 milliard dollarga baholadi, shuningdek, Bezos milliarderlar reytingida 2017-yildan beri yetakchilik qilganini eslatib o‘tgan.

Xabarda aytilishicha, Tesla aksiyalari 2020-yilda 743 foizga o‘sdi. Aksiyalar 2021-yilda ham o‘sishda davom etmoqda. 7-yanvar kuni birja savdolarida elektromobil ishlab chiqaruvchi kompaniya aksiyalari qiymati yana 4,8 foizga o‘sgan.

2020-yil boshidan buyon Ilon Mask boyligi Tesla aksiyalaring o‘sishi tufayli 150 milliardga ko‘paygan. Bloomberg ma’lumotiga ko‘ra, yangi tarixda biznesmen boyligining oshishini eng tez o‘sish, deb hisoblash mumkin.

Bloomberg’da qayd etilishicha, Jeff Bezos rafiqasi Makkenzi Skott bilan ajrashmaganda dunyodagi eng badavlat odamlar reytingida Maskdan ancha oldinda bo‘lardi. Ajrim oqibatida Bezos aksiyalar paketining katta ulushini rafiqasiga bergan. Makkenzi Skott ajrashishdan so‘ng mablag‘larni xayriya ishlariga yo‘naltirdi.