Butun dunyo bo‘yicha 2020-yilda o‘ta qashshoqlik darajasi so‘nggi 22 yil ichida birinchi marta oshgan. Bu haqda BMT bosh kotibi Antoniu Guterrish BMT Xavfsizlik kengashining tinchlik va barqarorlikni saqlashga bag‘ishlangan videoformatdagi majlisida aytib o‘tdi, deb yozadi “TASS”.
Bosh kotib ta’kidlashicha, koronavirus pandemiyasi bir qator salbiy tendensiyalarni chuqurlashtirgan. “2020-yilda o‘ta qashshoqlik darajasi 22 yil ichida birinchi marta o‘sdi, — dedi u. — Nozik vaziyatda va nizolar sharoitida iqtisodiy faollikning pasayishi qo‘shimcha yana 18 dan 27 million nafargacha odamni qashshoqlikka keltirishi kutilmoqda”.
Guterrish, shuningdek, butun dunyoda “gender tengsizlik chuqurlashayotganiga, inklyuziv rivojlanish uchun asosiy drayver sifatida ishlayotgan ayollar ulushi nuqtai nazaridan dunyo bir necha o‘n yilga ortga qaytgani”ga e’tibor qaratdi.
“Agar biz qashshoqlik va nizolar doirasini uzmoqchi bo‘lsak, bizga barqaror rivojlanish maqsadlarida belgilab qo‘yilgan ikkita tamoyilga asoslangan yanada jur’atliroq yondashuv kerak”, — degan jahon tashkiloti rahbari.
“Birinchidan, bu o‘zaro bog‘liqlik: tinchliksiz barqaror rivojlanish va barqaror rivojlanishsiz tinchlik bo‘lishi mumkin emas, — dedi u. — Ikkinchidan, jalb qilinish. ‘Hech kimni orqada qoldirmaslik’ majburiyati barqaror rivojlanishni ilgari surish hamda nizolarning oldini olish va ularni hal qilish bo‘yicha intilishlarimiz markazida bo‘lishi kerak”.
Izoh (0)