Xitoyning shisha idishlarga qadoqlangan ichimlik suvi ishlab chiqaruvchi Nongfu Spring kompaniyasi asoschisi Chjun Shanshan Bloomberg versiyasiga ko‘ra Osiyoning eng boy odamiga aylandi, deb yozmoqda Inc.
2020-yilda xitoylik tadbirkor 70 milliard dollardan ko‘proq mablag‘ ishlab topgan. Shanshanning boyligi 77,8 milliard dollarga baholanadi — bu uni dunyo bo‘yicha eng boy odamlari reytingida 11-o‘rin, Osiyoda esa birinchi o‘rinda turuvchi shaxsga aylantirdi.
Undan avval Osiyodagi eng boy odam Hindistonning Reliance Industries kompaniyasi direktorlar kengashi raisi, boshqaruvchi direktor va kompaniyaning asosiy egasi bo‘lgan Mukesh Ambani hisoblanardi.
Shanshan Nongfu Spring kompaniyasidan tashqari gepatitga qarshi vaksina va COVID-19’ni aniqlash bo‘yicha test ishlab chiqaruvchi Wantai Biological Pharmacy Enterprise Co., kompaniyasini ham boshqaradi. Ikkala kompaniyaning 2019-yildagi daromadi 3,6 milliard dollardan oshgan.
Chjun Shanshan “yakka bo‘ri” nomi bilan tanilgan va kamdan kam hollarda jamoat oldida paydo bo‘ladi va OAV bilan muloqotda bo‘ladi.
Eslatib o‘tamiz, Chjun Shanshan 2020-yilning sentabrida Xitoyning eng boy odamiga aylangandi.
Izoh (0)