Коронавируснинг енгил шаклига чалинган беморлар (касалхонага ётмаган) вирусни юқтириб олганидан кейин бир неча ой давомида унинг маълум белгиларини ўзида сезмоқда ва парваришга муҳтож бўлиб қоляпти. Бу ҳақда Бельгия ва Нидерландия олимлари гуруҳи томонидан ўтказилган тадқиқот натижаларига таяниб, «РБК» хабар берди.
Тадқиқотда коронавируснинг енгил шаклидан тузалган 1837 киши иштирок этди. Олимлар уларнинг инфекциядан кейин қайта тикланиш жараёнлари ва суръатини тадқиқ қилган. Аниқланишича, тадқиқот иштирокчиларининг жуда кам қисми (7,7 фоиз) касалликка чалингунига қадар кундалик юмушларида ўзгалар ёрдамига муҳтож бўлган. Аммо инфекция белгилари аниқланганидан ўртача 79 кундан сўнг, ушбу талаб сезиларли даражада ошган (52,4 фоиз). Тадқиқот иштирокчиларининг 30 фоиздан ортиғи парваришга муҳтож дея тан олинган.
Олимларнинг сўзларига кўра, тадқиқотда иштирок этганлар узоқ вақтда чарчоқ (98 фоиз), мушаклар кучсизлиги (90 фоиз), уйқунинг бузилиши (88 фоиз) ва оғриқларни (87 фоиз) ҳис қилган.
Тадқиқот муаллифлари агарда касаллик белгилари 12 ҳафтадан ортиқроқ сақланиб қолса, коронавирусни сурункали деб аташ таклифини билдирган.
Тадқиқотчилар коронавирус касаллигининг енгил шакли билан оғриган беморларга катта таъсир кўрсатади деган хулосага келган.
«Белгилар бошланганидан тахминан уч ой ўтгач, касалхонага ётқизилмаган беморларнинг катта қисми маълум даражада шахсий парвариш учун бошқаларга боғланиб қолган. Бу COVID-19’нинг беморлар кундалик ҳаётига таъсири жуда катта эканини ва беморларнинг мустақиллигини тиклаш учун даволаш стратегиясини аниқлашга кўпроқ эътибор қаратиш лозимлигини кўрсатади», — дейди олимлар.
Аввалроқ АҚШдаги турли тадқиқот марказлари олимлари касаллик инсоннинг бутун организмига таъсир кўрсатиши ва салбий оқибатлар яна узоқ йил сақланиб қолишини маълум қилганди.
Изоҳ (0)