2020-yilning eng sermahsul futbolchilari. Messi va Saloh kuchli beshlikda ham yo‘q

Koronavirus pandemiyasi tufayli 2020-yilda futbolda katta tanaffus qayd etildi. Ammo bu tanaffuslar to‘purarlarga xalaqit bera olmadi. Quyida ortda qolgan yilning eng sermahsul (barcha musobaqalar inobatga olingan) futbolchilari haqida hikoya qilinadi.

Patson Daka (“Zalsburg”): 36 o‘yin, 25 ta gol

Ro‘yxatni 22 yoshli zambiyalik hujumchi Patson Daka ochib beradi. Aynan u jamoasida “Borussiya”ga ketgan Erling Holandning o‘rnini egalladi. 2020-yilda yosh forvard o‘rtacha har 95 daqiqada gol urdi. Oktabr oyida kelib esa unga “Manchester Siti” qiziqish bildirdi, “shaharliklar” skautlari unda Serxio Agueroning o‘rinbosarini ko‘rdi.

Transfermarkt portali iqtidorli futbolchini 20 million yevroga baholamoqda, ammo “Zalsburg” katta ehtimol bilan futbolchisi uchun ko‘proq so‘raydi.

Lionel Messi (“Barselona”): 44 uchrashuv, 26 ta gol

Argentinalik uchun bu yil qiyin va asabiy o‘tdi. “Barselona” bilan Chempionlar Ligasida sharmandali tarzda mag‘lubiyatga uchragan bo‘lsa, La Ligada chempionlikni “Real” ilib ketdi. 33 yoshli argentinalik futbolchi o‘yindan (penaltidan esa ko‘proq) kam gol urdi. “Barselona” sardori 26 golidan 8 tasini penaltidan urdi va har bir gol uchun unga 151 daqiqa kerak bo‘ldi. Shunga qaramay 2020-yilda Messi bir klub safidagi gollari soni bo‘yicha afsonaviy Pelening rekordini yangilashga muvaffaq bo‘ldi. “Valyadolid”ga qarshi kechgan safar o‘yinida Messi “Barselona” safidagi 644-golini urdi.

Muhammad Saloh (“Liverpul”): 44 uchrashuv, 26 ta gol

Yilning birinchi yarmi misrlik uchun unchalik ham samarali o‘tmadi (yanvardan iyunga qadar 8 ta gol). Ammo ikkinchi qismga kelib, tezlikni oshirdi. Saloh hozirda 15 o‘yinda 13 ta gol urib, Premyer Liga to‘purarlari poygasida yetakchilik qilmoqda. 2020-yil yakunlari bo‘yicha Britaniyaning Mirror gazetasi uni muxlislar talqiniga ko‘ra Angliya chempionatining eng yaxshi futbolchisi deb tan oldi.

Kilian Mbappe (PSJ): 36 uchrashuv, 26 ta gol

2020-yilda fransuz Chempionlar Ligasida g‘alaba qozonishga juda yaqin kelgandi. Ammo uning jamoasi “Bavariya”ga minimal hisobda imkoniyatni boy berib qo‘ydi (0:1). Dekabr oyi boshida Mbappe 21 yosh-u 11 oyligida Chempionlar Ligasidan o‘rin olgan “Istanbul”ga qarshi o‘yinda raqib darvozasini ishg‘ol etib, mazkur musobaqadagi o‘zining 20-golini urdi va Lionel Messining rekordini yangiladi. Shu tariqa Kilian ushbu ko‘rsatkichga (20 ta gol urgan) erishgan eng yosh futbolchiga aylandi. Yevropaning gigant jamoalari esa hozirda yosh iqtidorni o‘z jamoasiga qo‘shib olish haqida bosh qotirmoqda.

Brunu Fernandesh (“Manchester Yunayted”): 50 uchrashuv, 28 ta gol

Lissabonning “Sporting” klubidan o‘tganidan so‘ng Brunu “qizil iblislar”ning boshlang‘ich tarkibida o‘ynab ketish bilan birga “Manchester Yunayted”ning yetakchisiga ham aylandi. U APLning 29 o‘yinida 18 gol urdi va 14 golga uzatma berdi. Bu uning o‘rtacha har bir uchrashuvda jamoasining kamida bitta golida qatnashganini bildiradi.

Erling Holand (“Borussiya D”): 32 uchrashuv, 33 ta gol

Norvegiyalik hujumchi “arilar” o‘yin uslubiga juda tez moslashdi. 2020-yil esa u uchun juda muvaffaqiyatli o‘tdi: Noyabr oyi oxirida Yeropaning eng yaxshi yosh futbolchisiga topshiriladigan Golden Boy mukofotini olgan bo‘lsa, dekabr oyida Norvegiyada yilning eng yaxshi futbolchisi deb topildi. Holand shu bilan to‘xtamoqchi emas va allaqachon “Oltin to‘p” va Chempionlar Ligasi haqida orzu qilayotganini e’lon qilgan.

Chiro Immobile (“Latsio”): 39 uchrashuv, 34 ta gol

Avgust oyi boshida italiyalik hujumchi Robert Levandovski va Krishtianu Ronalduni ortda qoldirib, “Oltin butsa”ni qo‘lga kiritgandi. U 2019/2020-yilgi mavsumda 36 gol bilan Yevropaning eng yaxshi to‘purariga aylandi. 2020/21-yilgi mavsumda esa Immobilening ko‘rsatkichlari biroz pasaydi. A Seriyada italiyalik 13 uchrashuvda 10 ta gol urdi va to‘purarlar poygasida Ronaldu (14), Lukakudan (12) ortda qolmoqda.

Romelu Lukaku (“Inter”): 47 uchrashuv, 35 ta gol

“Manchester Yunayted”dan ketgach, belgiyalik “Inter”da o‘z joyini topishga muvaffaq bo‘ldi. 2020-yilda Lukaku har 107 daqiqada gol urdi. 27 yoshli hujumchi ushbu natijalaridan keyin o‘zini dunyoning eng yaxshi besh hujumchilari qatoriga qo‘shdi.

“Hujumchilarni pog‘onalarga qo‘yishni istamayman, lekin men aniq beshlikka kiraman”, – deydi Lukaku.

Krishtianu Ronaldu (“Yuventus”): 39 uchrashuv, 41 ta gol

Yoshiga qaramay portugaliyalik futbolchi hamon ajoyib sport formasini ushlab turibdi. A Seriyaning 2020/21-yilgi mavsumida Ronalduning 11 ta o‘yinda 14 ta gol urib to‘purarlar poygasida peshqadamlik qilayotgani ham bunga yaqqol misol bo‘la oladi. 35 yoshli futbolchi biroz muddat oldin Globe Soccer Awards talqiniga ko‘ra asrning eng yaxshi futbolchisi deb topildi. Uning o‘zi esa hozirda o‘zini yaxshi his qilayotganini va yana ko‘plab mavsumlar o‘tkaza olishiga umid qilishini aytdi.

“O‘zimni yaxshi his qilyapman, hozir hayotimdagi eng yaxshi damlar. Umid qilamanki, yana ko‘p mavsumlarni o‘tkazaman, ammo bundan keyin nima bo‘lishini hech kim bilmaydi. Agar sizda motivatsiya bo‘lsa, yosh muhim emas. Oldimda porloq kelajakni ko‘ryapman va bundan xursandman”, – deydi Ronaldu.

Robert Levandovski (“Bavariya”): 39 uchrashuv, 45 ta gol

2020-yildagi eng sermahsul futbolchi “Bavariya”ning polshalik hujumchisi bo‘ldi. Levandovski FIFA talqiniga ko‘ra, yilning eng yaxshi o‘yinchisi mukofotiga sazovor bo‘ldi. Shuningdek, The Guardian nashri ham Robertni 1-o‘ringa loyiq ko‘rdi. Bundan tashqari Xalqaro sport press assotsiatsiyasi uni “Yilning eng yaxshi sportchisi” unvoni bilan mukofotladi. Levandovski ovoz berish natijalariga ko‘ra, Formula-1 uchuvchisi Lyuis Hemilton va tennischi Rafael Nadalni ortda qoldirdi. Umuman olganda, polshalik futbolchi uchun 2020-yil faoliyatidagi eng muvaffaqiyatlisi bo‘ldi.