“Barselona” hujumchisi Lionel Messi La Liga 17-turi doirasida “Ueska”ga qarshi kechgan bahsda (1:0) asosiy tarkibda maydonga tushdi.
Bu 33 yoshli argentinalik futbolchi uchun “Barselona” safidagi 750-rasmiy o‘yin bo‘ldi, shuningdek, u Primeradagi 500-uchrashuvini o‘tkazdi.
Bu ko‘rsatkichlar borasida Messi rekordchi Xaviga yaqinlashib bormoqda. Ispaniyalik yarim himoyachi 1998—2015-yillar mobaynida katalonlar safida umumiy 767 o‘yin o‘tkazgandi, ulardan 505 tasi La Liga o‘yinlari.
Messi “Barselona” safida 644 ta gol urgan va klubning eng yaxshi to‘purari hisoblanadi.
Bundan tashqari Messi La Ligadagi g‘alabalar (368), gollar (451), asosiy tarkibda maydonga tushish (444) va chempionlik sovrinlari (10) borasida “Barselona” futbolchilar orasida eng yaxshi ko‘rsatkichga ega.
Ma’lumot uchun Messi La Ligada 500 ta o‘yin o‘tkazgan ilk legionerga aylandi. Shuningdek, Messi butun faoliyati mobaynidagi 300-golli uzatmani amalga oshirdi — 260 ta “Barselona”da, 40 ta Argentina terma jamoasida.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)