Коронавирус пандемияси туфайли 2020 йилда футболда катта танаффус қайд этилди. Аммо бу танаффуслар тўпурарларга халақит бера олмади. Қуйида ортда қолган йилнинг энг сермаҳсул (барча мусобақалар инобатга олинган) футболчилари ҳақида ҳикоя қилинади.
Пацон Дака («Зальцбург»): 36 ўйин, 25 та гол
Рўйхатни 22 ёшли замбиялик ҳужумчи Пацон Дака очиб беради. Айнан у жамоасида «Боруссия»га кетган Эрлинг Ҳоланднинг ўрнини эгаллади. 2020 йилда ёш форвард ўртача ҳар 95 дақиқада гол урди. Октябрь ойида келиб эса унга «Манчестер Сити» қизиқиш билдирди, «шаҳарликлар» скаутлари унда Серхио Агуэронинг ўринбосарини кўрди.
Transfermarkt портали иқтидорли футболчини 20 миллион еврога баҳоламоқда, аммо «Зальцбург» катта эҳтимол билан футболчиси учун кўпроқ сўрайди.
Лионель Месси («Барселона»): 44 учрашув, 26 та гол
Аргентиналик учун бу йил қийин ва асабий ўтди. «Барселона» билан Чемпионлар Лигасида шармандали тарзда мағлубиятга учраган бўлса, Ла Лигада чемпионликни «Реал» илиб кетди. 33 ёшли аргентиналик футболчи ўйиндан (пенальтидан эса кўпроқ) кам гол урди. «Барселона» сардори 26 голидан 8 тасини пенальтидан урди ва ҳар бир гол учун унга 151 дақиқа керак бўлди. Шунга қарамай 2020 йилда Месси бир клуб сафидаги голлари сони бўйича афсонавий Пеленинг рекордини янгилашга муваффақ бўлди. «Вальядолид»га қарши кечган сафар ўйинида Месси «Барселона» сафидаги 644-голини урди.
Муҳаммад Салоҳ («Ливерпуль»): 44 учрашув, 26 та гол
Йилнинг биринчи ярми мисрлик учун унчалик ҳам самарали ўтмади (январдан июнга қадар 8 та гол). Аммо иккинчи қисмга келиб, тезликни оширди. Салоҳ ҳозирда 15 ўйинда 13 та гол уриб, Премьер Лига тўпурарлари пойгасида етакчилик қилмоқда. 2020 йил якунлари бўйича Британиянинг Mirror газетаси уни мухлислар талқинига кўра Англия чемпионатининг энг яхши футболчиси деб тан олди.
Килиан Мбаппе (ПСЖ): 36 учрашув, 26 та гол
2020 йилда француз Чемпионлар Лигасида ғалаба қозонишга жуда яқин келганди. Аммо унинг жамоаси «Бавария»га минимал ҳисобда имкониятни бой бериб қўйди (0:1). Декабрь ойи бошида Мбаппе 21 ёш-у 11 ойлигида Чемпионлар Лигасидан ўрин олган «Истанбул»га қарши ўйинда рақиб дарвозасини ишғол этиб, мазкур мусобақадаги ўзининг 20-голини урди ва Лионель Мессининг рекордини янгилади. Шу тариқа Килиан ушбу кўрсаткичга (20 та гол урган) эришган энг ёш футболчига айланди. Европанинг гигант жамоалари эса ҳозирда ёш иқтидорни ўз жамоасига қўшиб олиш ҳақида бош қотирмоқда.
Бруну Фернандеш («Манчестер Юнайтед»): 50 учрашув, 28 та гол
Лиссабоннинг «Спортинг» клубидан ўтганидан сўнг Бруну «қизил иблислар»нинг бошланғич таркибида ўйнаб кетиш билан бирга «Манчестер Юнайтед»нинг етакчисига ҳам айланди. У АПЛнинг 29 ўйинида 18 гол урди ва 14 голга узатма берди. Бу унинг ўртача ҳар бир учрашувда жамоасининг камида битта голида қатнашганини билдиради.
Эрлинг Ҳоланд («Боруссия Д»): 32 учрашув, 33 та гол
Норвегиялик ҳужумчи «арилар» ўйин услубига жуда тез мослашди. 2020 йил эса у учун жуда муваффақиятли ўтди: Ноябрь ойи охирида Еропанинг энг яхши ёш футболчисига топшириладиган Голден Бой мукофотини олган бўлса, декабрь ойида Норвегияда йилнинг энг яхши футболчиси деб топилди. Ҳоланд шу билан тўхтамоқчи эмас ва аллақачон «Олтин тўп» ва Чемпионлар Лигаси ҳақида орзу қилаётганини эълон қилган.
Чиро Иммобиле («Лацио»): 39 учрашув, 34 та гол
Август ойи бошида италиялик ҳужумчи Роберт Левандовски ва Криштиану Роналдуни ортда қолдириб, «Олтин бутса»ни қўлга киритганди. У 2019/2020 йилги мавсумда 36 гол билан Европанинг энг яхши тўпурарига айланди. 2020/21 йилги мавсумда эса Иммобиленинг кўрсаткичлари бироз пасайди. А Серияда италиялик 13 учрашувда 10 та гол урди ва тўпурарлар пойгасида Роналду (14), Лукакудан (12) ортда қолмоқда.
Ромелу Лукаку («Интер»): 47 учрашув, 35 та гол
«Манчестер Юнайтед»дан кетгач, бельгиялик «Интер»да ўз жойини топишга муваффақ бўлди. 2020 йилда Лукаку ҳар 107 дақиқада гол урди. 27 ёшли ҳужумчи ушбу натижаларидан кейин ўзини дунёнинг энг яхши беш ҳужумчилари қаторига қўшди.
«Ҳужумчиларни поғоналарга қўйишни истамайман, лекин мен аниқ бешликка кираман», – дейди Лукаку.
Криштиану Роналду («Ювентус»): 39 учрашув, 41 та гол
Ёшига қарамай португалиялик футболчи ҳамон ажойиб спорт формасини ушлаб турибди. А Сериянинг 2020/21 йилги мавсумида Роналдунинг 11 та ўйинда 14 та гол уриб тўпурарлар пойгасида пешқадамлик қилаётгани ҳам бунга яққол мисол бўла олади. 35 ёшли футболчи бироз муддат олдин Globe Соccер Awards талқинига кўра асрнинг энг яхши футболчиси деб топилди. Унинг ўзи эса ҳозирда ўзини яхши ҳис қилаётганини ва яна кўплаб мавсумлар ўтказа олишига умид қилишини айтди.
«Ўзимни яхши ҳис қиляпман, ҳозир ҳаётимдаги энг яхши дамлар. Умид қиламанки, яна кўп мавсумларни ўтказаман, аммо бундан кейин нима бўлишини ҳеч ким билмайди. Агар сизда мотивация бўлса, ёш муҳим эмас. Олдимда порлоқ келажакни кўряпман ва бундан хурсандман», – дейди Роналду.
Роберт Левандовски («Бавария»): 39 учрашув, 45 та гол
2020 йилдаги энг сермаҳсул футболчи «Бавария»нинг полшалик ҳужумчиси бўлди. Левандовски ФИФА талқинига кўра, йилнинг энг яхши ўйинчиси мукофотига сазовор бўлди. Шунингдек, The Guardian нашри ҳам Робертни 1-ўринга лойиқ кўрди. Бундан ташқари Халқаро спорт пресс ассоциацияси уни «Йилнинг энг яхши спортчиси» унвони билан мукофотлади. Левандовски овоз бериш натижаларига кўра, Formula-1 учувчиси Льюис Ҳемилтон ва теннисчи Рафаэл Надални ортда қолдирди. Умуман олганда, полшалик футболчи учун 2020 йил фаолиятидаги энг муваффақиятлиси бўлди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)