Bayram kunlarida ham qarzdorlik uchun elektr energiyasi ta’minoti uzilishi mumkin – “Hududiy elektr tarmoqlari”

“Hududiy elektr tarmoqlari” AJ bayram kunlari elektr uzilmasligi uchun elektr energiyasi uchun qarzlarni to‘lashga chaqirdi.

“Hududiy elektr tarmoqlari” AJ barcha elektr energiyasi iste’molchilarini Yangi yil bilan tabriklagan holda bayram kunlari qarzdorlik tufayli xonadoningizda elektr energiyasida uzilishlar bo‘lishining oldini olish maqsadida foydalanilgan elektr energiyasi uchun mamlakatimizda mavjud to‘lov tizimlari (U-Pay, Click, Payme, Paynet) hamda banklarning mobil ilovalari orqali uydan chiqmasdan turib to‘lovlarni amalga oshirishlari mumkinligini yana bir bor eslatib o‘tgan.

“Respublikamizda elektr energiyasini hisobga olish va nazorat qilishning avtomatlashtirilgan tizimini (ASKUE) joriy etilishi munosabati bilan qarzdorlar avtomatik tarzda tarmoqdan uziladi”, — deya ogohlantiradi korxona.

Avvalroq Energetika vazirligi nega elektr ta’minoti uchun mavjud qarz to‘langandan so‘ng, elektr energiyasi avtomatik tarzda ishga tushmasligiga javob bergandi. Unga ko‘ra, ASKUE tizimi iste’molchilarning 100 foizini qamraganidan so‘ng to‘liq tartibda ishlay boshlaydi. Bugungi kungacha 72 foiz iste’molchilarga ushbu turdagi hisoblagichlar o‘rnatilgan. Ushbu tizimga to‘liq ulanish 2021-yil apreligacha rejalashtirilgan.

“Hududiy elektr tarmoqlari” AJ boshqaruvi raisining birinchi o‘rinbosari Jahongir Obidjonovning ma’lum qilishicha, bugungi kunda O‘zbekistonda elektr energiyasi bo‘yicha qarzdorlik 3,5 trillion so‘mni tashkil etmoqda.