“Hududgazta’minot” kompaniyasi Yangi yil arafasi uzunligi 8 kilometr, diametri esa 1020 millimetrni tashkil etadigan gaz quvurini qurishni boshladi, deb xabar beradi kompaniya matbuot xizmati.
Ta’kidlanishicha, bu turdagi obyektni qurish ishlari so‘nggi 40 yildan buyon birinchi marotaba amalga oshirilayotgan bo‘lib, uning foydalanishga topshirilishi Toshkent shahrida gaz ta’minotini yaxshilashga xizmat qiladi.
“Hududgazta’minot” ma’lumotlariga ko‘ra, bugungi kunda poytaxtda 671 mingdan ortiq jismoniy va 13 ming yuridik shaxs tabiiy gaz iste’molchisi hisoblanadi. 2020-yilning o‘zida 4 milliard metr kubdan ortiq gaz yetkazib berilgan — bu o‘tgan yilgiga nisbatan 10 foizga ko‘p.
“Zangori olov iste’molining ortishi birinchi navbatda poytaxt infratuzilmasining rivojlangani, yangi turar joy massivlari qurilgani, yangi ishlab chiqarish quvvatlari yaratilgani bilan bog‘liq. Bu o‘z navbatida mavjud gaz taqsimlash tarmoqlari infratuzilmasini kengaytirishni talab etadi”, — deyiladi kompaniya xabarida.
Sergeli tumanida qurilish shtabi tuzilgan. Maydonchaga 2506 metr quvur yetkazilgan bo‘lib, ularning 655 metri hozirda payvandlangan. Obyektda 30 dan ortiq mutaxassis mehnat qilmoqda va 10 ta maxsus texnika jalb etilgan.
“Yangi gaz quvurini qurish ishlarini yakunlash 2021-yil yanvar oylariga rejalashtirilgan. Uning foydalanishga topshirilishi Toshkentda gaz halqa arteriyasining paydo bo‘lishiga imkon yaratib, poytaxt gaz ta’minotini yaxshilaydi, xususan, Chilonzor, Uchtepa, Yakkasaroy, Mirobod va Shayxontohur tumanlarining”, — deyiladi xabarda.
Eslatib o‘tamiz, 16-dekabr kuni Prezident Shavkat Mirziyoyev boshchiligida o‘tkazilgan videoselektor yig‘ilishida davlat rahbari elektr energiyasi, tabiiy gaz va ko‘mir ta’minoti masalalariga ham to‘xtalib o‘tgandi. Ta’kidlanishicha, O‘zbekistonda bugungi kunda gaz ta’minotida sutkasiga 20 million metr kub tanqislik mavjud.
Izoh (0)