Toshkent viloyati bosh infeksionisti Guljahon Yo‘ldoshevaning sudida navbatdagi guvohlar ko‘rsatmalari tinglandi. Sud 4-yanvargacha tanaffus e’lon qildi

28-dekabr kuni Toshkent viloyati yuqumli kasalliklar shifoxonasi bosh shifokori Guljahon Yo‘ldosheva ishi bo‘yicha navbatdagi sud majlisi bo‘lib o‘tdi, deb xabar beradi “Kun.uz”.

Navbatdagi sud majlisida ham ish bo‘yicha jalb etilgan guvoh va mutaxassislarning ko‘rsatmasi tinglangan.

Guvoh Valiya Jo‘rayeva karantin davrida Toshkent viloyati yuqumli kasalliklari shifoxonasida hamshira bo‘lib ishlagan. U sudda marhum Farrux Rustamovning ahvoli haqida gapirib, kasallik tarixida unga COVID-19 tashxisi qo‘yilmaganini, unga har gal kislorod ulanganda olib tashlashini aytgan.

Viloyat yuqumli kasalliklari shifoxonasida qorovul bo‘lib ishlagan guvoh Turdibek Aydinbayev Yo‘ldoshevaning har kuni ishga kelganini, shifoxonaga tekshiruv kelganida ularga to‘sqinlik qilmaganini bildirgan.

“Guljahon Yo‘ldoshevaga nisbatan e’lon qilingan iqtisodiy jinoyatlarga oid holatlar bo‘yicha Toshkent viloyati davlat moliyaviy nazorati boshqarmasi mutaxassisi Muzaffar Rahimov ko‘rsatmalari tinglandi. U shifoxona faoliyatida bir nechta moliyaviy xatoliklar bo‘lganini qayd etdi, bosh shifokor izoh berdi”, — deyiladi xabarda.

Shuningdek, sudda Toshkent viloyati yuqumli kasalliklari shifoxonasi bosh shifokor o‘rinbosari lavozimida ishlagan Nilufar Cho‘liyeva hamda shu shifoxonaning hamshira-provizori bo‘lib ishlagan Nafisa To‘rayeva, viloyat ruhiy-asab kasalliklari shifoxonasi xodimlari, hamshira va nazoratchilarining ham ko‘rsatmalari tinglangan.

Sud 2021-yilning 4-yanvarigacha tanaffus e’lon qilgani aytilmoqda.

Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari, xususan, Senat raisi Tanzila Norboyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasini o‘zgartirishga chaqirgan. Shundan so‘ng Guljahon Yo‘ldosheva 6-oktabr kuni uy qamog‘iga o‘tkazilgandi.

Guljahon Yo‘ldosheva va boshqalarga nisbatan sud jarayonlari 27-noyabr kuni boshlangan.