Байрам кунларида ҳам қарздорлик учун электр энергияси таъминоти узилиши мумкин – «Ҳудудий электр тармоқлари»

«Ҳудудий электр тармоқлари» АЖ байрам кунлари электр узилмаслиги учун электр энергияси учун қарзларни тўлашга чақирди.

«Ҳудудий электр тармоқлари» АЖ барча электр энергияси истеъмолчиларини Янги йил билан табриклаган ҳолда байрам кунлари қарздорлик туфайли хонадонингизда электр энергиясида узилишлар бўлишининг олдини олиш мақсадида фойдаланилган электр энергияси учун мамлакатимизда мавжуд тўлов тизимлари (U-Pay, Click, Payme, Paynet) ҳамда банкларнинг мобил иловалари орқали уйдан чиқмасдан туриб тўловларни амалга оширишлари мумкинлигини яна бир бор эслатиб ўтган.

«Республикамизда электр энергиясини ҳисобга олиш ва назорат қилишнинг автоматлаштирилган тизимини (АСКУЭ) жорий этилиши муносабати билан қарздорлар автоматик тарзда тармоқдан узилади», — дея огоҳлантиради корхона.

Аввалроқ Энергетика вазирлиги нега электр таъминоти учун мавжуд қарз тўлангандан сўнг, электр энергияси автоматик тарзда ишга тушмаслигига жавоб берганди. Унга кўра, АСКУЭ тизими истеъмолчиларнинг 100 фоизини қамраганидан сўнг тўлиқ тартибда ишлай бошлайди. Бугунги кунгача 72 фоиз истеъмолчиларга ушбу турдаги ҳисоблагичлар ўрнатилган. Ушбу тизимга тўлиқ уланиш 2021 йил апрелигача режалаштирилган.

«Ҳудудий электр тармоқлари» АЖ бошқаруви раисининг биринчи ўринбосари Жаҳонгир Обиджоновнинг маълум қилишича, бугунги кунда Ўзбекистонда электр энергияси бўйича қарздорлик 3,5 триллион сўмни ташкил этмоқда.