Farg‘ona viloyati Qo‘qon shahrida qisqa muddat ichida — 14 kunda — yangi gaz taqsimlash stansiyasi (GTS) qurib bitkazildi. Bu haqda shahar hokimligi matbuot xizmati xabar berdi.
Loyiha O‘zbekiston Prezidenti raisligida 16-dekabr kuni o‘tkazilgan videoselektr yig‘ilishida belgilab berilgan vazifalar ijrosi bo‘yicha amalga oshirilgan.
Ta’kidlanishicha, yangi gaz taqsimlash stansiyasining so‘nggi bo‘g‘inini Qo‘qon shahar hokimi Ma’rufjon Usmonovning o‘zi payvandlagan.
Qo‘qon shahridagi 9200 aholi xonadonlari hamda ijtimoiy obyektlarda tabiiy gaz ta’minotini yaxshilash imkonini bergan gaz taqsimlash stansiyasi “Hududgaz Farg‘ona” gaz ta’minoti filiali va “Qo‘qon shahar gaz” gaz ta’minoti bo‘limi sa’y-harakatlari bilan ishga tushirilgan.
Avvalroq Qo‘qondagi mahallalardan birining aholisi gaz va elektr energiyasi ta’minotining yo‘qligi sabab hokimlik qarshisidagi yo‘lni to‘sib qo‘ygani to‘g‘risida xabar berilgandi. Shahar hokimi mahallaga tashrif buyurib, aholiga yangi GTS yil oxirigacha ishga tushirilishini ma’lum qilgandi.
Izoh (0)