Oqqo‘rg‘onda haydovchisi boshqaruvni yo‘qotgan Nexia ag‘darilib ketdi

Toshkent viloyati Oqqo‘rg‘on tumanida Nexia-3 avtomobili ag‘darilib ketdi, deya xabar bermoqda YHXBB.

Ma’lum qilinishicha, 2020-yilning 27-dekabr kuni soat 10:30 larda Toshkent viloyati Oqqo‘rg‘on tumani hududidan o‘tgan Oqqo‘rg‘on–Bo‘ka avtomobil yo‘lining 6-kilometrida haydovchi, 1991-yilda tug‘ilgan B.H. Nexia-3 rusumli avtomobilda harakatlanayotib, ehtiyotsizligi oqibatida rul boshqaruvini yo‘qotgan va yo‘ldan chiqib ketib, pastlikka ag‘darilgan.

Ag‘darilish natijasida hech kim tan jarohati olmagan.

Hodisa yuzasidan Oqqo‘rg‘on tumani IIB YHXB tomonidan surishtiruv ishlari olib borilib, sabablariga aniqlik kiritilmoqda.

Avvalroq Oqdaryoda ortidan yuk mashinasi kelib urgan avtobus pastlikka ag‘darilib ketgani, Farg‘onada Nexia bilan to‘qnashgan Tracker yonib ketgani hamda Namanganda 4 nafar o‘smir sayr qilib kelish bahonasida Spark’ni olib qochib, YTHga uchragani haqida xabar berilgandi.