O‘tgan hafta butun dunyo ommaviy axborot vositalarida 2021-yilda Apple Car taqdim etilishi to‘g‘risida xabarlar tarqaldi. CARakoom’ning yozishicha, ko‘pchilik internetda tarqalgan videoni Apple’ning kelajakdagi avtomobili deb hisoblamoqda.
Trekbol-g‘ildiraklar — fantastlarning azaliy orzusi bo‘lib, videoda tasvirlangan model kompyuter grafikasi hisoblandi. Ta’kidlanishicha, unda 2013-yilgi Mercedes-Benz konsept-karining 3D-modeli tasvirlangan. Video muallifi Mercedes-Benz AMG Vision Gran Turismo’ga Apple logotipini “yopishtirgan”. Trekbol-g‘ildiraklar esa fizik jihatdan imkonsiz (hozircha).
Avvalroq Tayvanning Economic Daily News sayti Apple 2021-yilning sentabriga borib o‘zining birinchi avtomobilini taqdim etishni rejalashtirayotganini ma’lum qilgandi.
Hisobotda aytilishicha, Apple 2021-yilning ikkinchi choragida ehtiyot qismlarning yetkazib berilishi hajmini oshirish bo‘yicha kelishuvga erishgan. Shuningdek, kompaniya Kaliforniya yo‘llarida o‘nlab prototiplar “maxfiy rejimda” sinovdan o‘tkazayotgani haqida so‘z boradi.
Eslatib o‘tamiz, Apple avtopilotni sinovdan o‘tkazish bo‘yicha ruxsatnomani 2017-yilda qo‘lga kiritgan. Kompaniya o‘z avtomobilini yaratishga tayyorlanayotgani to‘g‘risidagi mish-mishlar kamida 5 yil oldin tarqalishni boshlagan. Xususan, 2015-yili Apple 2019-yilgacha o‘z elektromobilini taqdim etishi to‘g‘risida xabar berilgandi.
Izoh (0)