Armaniston bosh vaziri Nikol Pashinyan agar xalq uning iste’fosini xohlayotgan bo‘lsa, iste’foga chiqishga tayyorligini ma’lum qildi. Bu haqda “Korrespondent.net” xabar berdi.
“Men xalqning qarori natijasida bosh vazir lavozimidan iste’foga chiqishga tayyorman. Bosh vazir lavozimidan faqat xalq qarori asosida ketishim mumkin”, — deb yozgan Pashinyan Facebook’da.
Pashinyanning qayd etishicha, u “xalqning ishonchi tiklangan taqdirda hozirgi murakkab paytda” Armanistonga rahbarlik qilishni davom ettirishi mumkin.
“Bu savollarga javob olishning yangona usuli bor — navbatdan tashqari parlament saylovini o‘tkazish”, — deya qo‘shimcha qilgan Pashinyan.
Bosh vazir “parlamentdagi va manfaatdor kuchlarga” 2021-yilda navbatdan tashqari parlament saylovini o‘tkazishni taklif qilgan.
Yerevanda 22-dekabr kuni hukumatga qarshi norozilik namoyishlari qayta boshlangan. Muxolifat umummilliy ish tashlash e’lon qilgan. Nikol Pashinyanga qarshi namoyishchilar hukumat binolarini to‘sib qo‘ygan va Respublika maydoniga chodirlar o‘rnatgan.
Eslatib o‘tamiz, Armaniston muxolifat partiyasi noyabr oyida Armaniston bosh vaziri Rossiya va Ozarbayjon rahbarlari bilan Tog‘li Qorabog‘dagi harbiy harakatlarni to‘xtatish va mintaqadagi hududlarning bir qismini Ozarbayjonga topshirish haqidagi kelishuvni imzolaganidan buyon uning iste’fosini talab qilmoqda. Dekabr oyining boshida Pashinyanning raqobatchilari fuqarolar unga bo‘ysunmaslik aksiyasini boshlaganini ma’lum qilgandi.
Ma’lumot uchun, Armanistonda 2018-yilning aprel oyida bo‘lib o‘tgan parlament saylovida mamlakatning o‘sha paytdagi prezidenti Serj Sargsyan boshchilik qiladigan o‘ng konservatorlar partiyasi 49,12 foiz ovoz to‘plab g‘olib chiqqandi. Shundan so‘ng, Serj Sargsyan nomzodi bosh vazir lavozimiga ilgari surilgan va bunga qarshi Yerevanda namoyish boshlangan. O‘shanda Armaniston parlamenti deputati bo‘lgan Nikol Pashinyan Yerevan aholisini ommaviy bo‘ysunmaslik aksiyalarini uyushtirish, jumladan, ko‘chalar va ko‘priklarda harakatlanishga to‘sqinlik qilish, metropoliten faoliyatiga yo‘l qo‘ymaslik, banklardagi barcha hisob raqamlaridan pullarni olishga chaqirgandi. Armanistonda namoyishchilar davlat muassasalarini qamal qilishga kirishgach, Nikol Pashinyan mamlakatda inqilob boshlanganini e’lon qilgan.
Armaniston bosh vaziri bo‘lgan Serj Sargsyan uning tayinlanishiga qarshi uyushtirilgan ommaviy chiqishlardan so‘ng lavozimini tark etishga majbur bo‘lgan. Buning ortidan o‘sha paytda Armanistondagi muxolifatchilar yetakchisi, “Yelk” partiyasining parlament fraksiyasi rahbari Nikol Pashinyan mamlakat bosh vazirligiga nomzod sifatida ro‘yxatdan o‘tkazilgan, keyinroq bosh vazir etib tayinlangan.
Nikol Pashinyan 2018-yilning oktabr oyida mamlakatda navbatdan tashqari parlament saylovlari o‘tkazilishiga erishish maqsadida iste’foga chiqdi va bosh vaziri vazifasini bajaruvchi sifatida parlamentni tarqatib yubordi. 2018-yilning dekabr oyida bo‘lib o‘tgan parlament saylovida Pashinyanning partiyasi g‘alaba qozongan.
Izoh (0)