AQShning Nyu-York shtatida politsiya COVID-19’ga qarshi vaksinani tarqatish va jismoniy shaxslarga taqdim etish bo‘yicha qoidani chetlab o‘tgan holda uni firibgarlik yo‘llari orqali olish bilan bog‘liq ma’lumotlarni tekshirmoqda. “RBK”ning yozishicha, bu haqda shtat sog‘liqni saqlash departamenti matbuot xizmati xabar berdi.
Unda aytilishicha, Orijin okrugida tibbiy yordam ko‘rsatadigan Parcare klinikalar tarmog‘i koronavirusga qarshi vaksinani firibgarlik yo‘li bilan olgan bo‘lishi va uni shtatning boshqa tibbiy muassasalariga yo‘naltirgan bo‘lishi mumkin.
Bundan tashqari, Parcare xodimlari shtatning vaksinatsiya rejasini buzib, dori vositasini jamoatchilikka yetkazishda gumon qilinmoqda.
“Sog‘liqni saqlash departamenti shtat politsiyasiga jinoiy ishni fosh qilishda yordam ko‘rsatadi. Ayb isbotlangan taqdirda, firibgarlik tuzilmasi ishtirokchilari qonunchilikka muvofiq javobgarlikka tortiladi”, — deyiladi xabarda.
Daily News xabariga ko‘ra, Parcare tarmog‘iga Orijin va Bruklin (Nyu-York shahrining aholi eng zich joylashgan punkti)dagi oltita klinikalar kiradi. Tibbiyot muassasalari asosan yahudiy diasporasi vakillariga xizmat ko‘rsatadi.
Klinikalar tarmog‘i bosh direktori Geri Shlezinger uning muassasalari Moderna kompaniyasidan 3500 doza vaksinani olganligini ochiq bildirgan. Parcare vaksinani emlash uchun internet orqali ro‘yxatdan o‘tgan 60 yoshdan oshgan barcha fuqarolarga “kim birinchi” prinsipi asosida berishni va’da qilgan. Nashrning yozishicha, bunday yondashuv vaksinatsiya rejasiga xilof, chunki qoidaga ko‘ra avval sog‘liqni saqlash xodimlari emlanadi.
AQSh hukumati Moderna vaksinasidan foydalanishni 19-dekabr kuni ma’qullagan. Ushbu preparat AQShda 18 yoshdan oshgan bemorlar uchun favqulodda foydalanish uchun tasdiqlangan ikkinchi dori bo‘ldi. Ishlab chiqaruvchilar vaksina 94 foiz samarador ekanligini ma’lum qilgan. Mamlakatda koronavirusga qarshi emlash 14-dekabrdan boshlangan.
26-dekabr kuni The New York Times AQShda Moderna vaksinasiga birinchi marta o‘tkir allergik reaksiya holati qayd etilganini ma’lum qilgan. Bostonlik shifokorda inyeksiya qilinganidan bir necha daqiqa o‘tgach, nojo‘ya ta’sir paydo bo‘lgan — uning yurak urishi tezlashib, qon bosimi tushgan, tili karaxt bo‘lib, sovuq ter chiqqan. Nashr shifokorning chig‘anoqlarga toqati yo‘qligi va emlashdan keyingi alomatlar ushbu allergenga xos ekanligini ta’kidlagan.
Izoh (0)