Rossiya prezidenti Vladimir Putin koronavirusga qarshi emlanmoqchi. “RBK”ning yozishicha, bu haqda uning matbuot kotibi Dmitriy Peskov “Rossiya 1” telekanali efirida ma’lum qilgan.
“U emlanmoqchiligini, shunday qarorga kelgani va barcha rasmiyatchiliklar tugashini kutganligini aytdi”, — degan Peskov.
Matbuot kotibining aytishicha, COVID-19’ga qarshi vaksina olish rejasi haqida prezidentning o‘zi yaqin kelajakda e’lon qiladi.
Peskov prezidentning qizi vaksinani sinovdan o‘tkazish uchun ko‘ngillilar guruhiga qo‘shilgani haqidagi mavzuni to‘xtatishni taklif qilib, “bu Putinning shaxsiy hayoti” ekanini bildirib o‘tgan. Kreml vakilining qo‘shimcha qilishicha, Putin qizining bunday qarorini Rossiya vaksinasiga ishonch darajasini ko‘rsatish maqsadida aytgan.
Avgust oyida Putin koronavirusga qarshi dunyoda birinchi vaksina ro‘yxatga olinganini ma’lum qilib, qizlaridan biri ushbu vaksina bilan emlanganini aytgandi. Shunday yo‘l bilan u sinovlarda ishtirok etganini ta’kidlagan.
17-dekabr kuni o‘tkazilgan matbuot anjumanida Putin nega hali ham COVID-19’ga qarshi vaksina olmagani haqidagi savolga javoban rossiyaliklarga qilish boshlangan vaksina hozircha hamma yoshdagilar uchun mo‘ljallanmaganligini, ammo imkoni paydo bo‘lishi bilan emlanishini bildirgandi. Ayni paytda Putin 68 yoshda.
26-dekabr kuni mamlakt sog‘liqni saqlash vaziri Mixail Murashko vazirlik klinik sinovlar natijalariga ko‘ra “Sputnik V” vaksinasini ommaviy emlash paytida 60 yoshdan oshganlarga qo‘llashga ruxsat berilganini ma’lum qilgan.
Izoh (0)