AQShning amaldagi prezidenti Donald Trampning aytishicha, koronavirusga qarshi kurash bo‘yicha cheklov choralari COVID-19’ning o‘zidan ko‘ra ko‘proq zarar yetkazmoqda. Bu haqda u o‘z Twitter’ida yozdi, deya xabar bermoqda “RBK”.
“Demokratlar tomonidan boshqarilayotgan shtatlarda karantin ko‘plab odamlarning hayotini butunlay vayron qilmoqda. Bu Xitoy virusining (Tramp koronavirusni shunday ataydi) o‘zi yetkazadigan zarardan battarroq”, — dedi u.
Trampning so‘zlariga ko‘ra, karantin choralariga qaramasdan, Kaliforniyada kasallanganlar soni o‘sishda davom etmoqda, Florida va boshqa shtatlarda esa lokdaun e’lon qilinmagan bo‘lsa-da, hukumat virusni eplamoqda.
Tramp butun Amerika bo‘yicha cheklovlarni bekor qilish zarurligi haqida ko‘p marta gapirib o‘tgan. U virus tarqalishini qat’iy lokdaun kiritmasdan ham eplash mumkinligini, cheklovlar esa AQSh iqtisodiyotiga ulkan zarar yetkazishi mumkinligini aytgan.
Shuningdek, AQSh prezidenti koronavirus tarqalishida Xitoyni aybdor qilib ko‘rsatadi. “Bunday voqea yuz bergani sizlarning aybingiz emas, bu Xitoyning aybi. Xitoyga esa bizning mamlakatga qilgan ishi qimmatga tushadi. Xitoyning butun dunyoga qilgan ishi qimmatga tushadi. Shuni esda tutinglar”, — degan edi Tramp.
AQShda koronavirus infeksiyasiga chalinish darajasi dunyo bo‘yicha eng yuqori hisoblanadi. Amerikaning Jons Hopkins universiteti ma’lumotlariga ko‘ra, pandemiya davrida mamlakatda qariyb 19 million kishi virusni yuqtirgan, shularning 331 mingdan ortig‘i vafot etgan.
Izoh (0)