Арманистон бош вазири Никол Пашинян истеъфога чиқишга тайёрлигини маълум қилди

Арманистон бош вазири Никол Пашинян агар халқ унинг истеъфосини хоҳлаётган бўлса, истеъфога чиқишга тайёрлигини маълум қилди. Бу ҳақда «Korrespondent.net» хабар берди.

«Мен халқнинг қарори натижасида бош вазир лавозимидан истеъфога чиқишга тайёрман. Бош вазир лавозимидан фақат халқ қарори асосида кетишим мумкин», — деб ёзган Пашинян Facebook’да.

Пашиняннинг қайд этишича, у «халқнинг ишончи тикланган тақдирда ҳозирги мураккаб пайтда» Арманистонга раҳбарлик қилишни давом эттириши мумкин.

«Бу саволларга жавоб олишнинг янгона усули бор — навбатдан ташқари парламент сайловини ўтказиш», — дея қўшимча қилган Пашинян.

Бош вазир «парламентдаги ва манфаатдор кучларга» 2021 йилда навбатдан ташқари парламент сайловини ўтказишни таклиф қилган.

Ереванда 22 декабрь куни ҳукуматга қарши норозилик намойишлари қайта бошланган. Мухолифат умуммиллий иш ташлаш эълон қилган. Никол Пашинянга қарши намойишчилар ҳукумат биноларини тўсиб қўйган ва Республика майдонига чодирлар ўрнатган.

Эслатиб ўтамиз, Арманистон мухолифат партияси ноябрь ойида Арманистон бош вазири Россия ва Озарбайжон раҳбарлари билан Тоғли Қорабоғдаги ҳарбий ҳаракатларни тўхтатиш ва минтақадаги ҳудудларнинг бир қисмини Озарбайжонга топшириш ҳақидаги келишувни имзолаганидан буён унинг истеъфосини талаб қилмоқда. Декабрь ойининг бошида Пашиняннинг рақобатчилари фуқаролар унга бўйсунмаслик акциясини бошлаганини маълум қилганди.

Маълумот учун, Арманистонда 2018 йилнинг апрель ойида бўлиб ўтган парламент сайловида мамлакатнинг ўша пайтдаги президенти Серж Саргсян бошчилик қиладиган ўнг консерваторлар партияси 49,12 фоиз овоз тўплаб ғолиб чиққанди. Шундан сўнг, Серж Саргсян номзоди бош вазир лавозимига илгари сурилган ва бунга қарши Ереванда намойиш бошланган. Ўшанда Арманистон парламенти депутати бўлган Никол Пашинян Ереван аҳолисини оммавий бўйсунмаслик акцияларини уюштириш, жумладан, кўчалар ва кўприкларда ҳаракатланишга тўсқинлик қилиш, метрополитен фаолиятига йўл қўймаслик, банклардаги барча ҳисоб рақамларидан пулларни олишга чақирганди. Арманистонда намойишчилар давлат муассасаларини қамал қилишга киришгач, Никол Пашинян мамлакатда инқилоб бошланганини эълон қилган.

Арманистон бош вазири бўлган Серж Саргсян унинг тайинланишига қарши уюштирилган оммавий чиқишлардан сўнг лавозимини тарк этишга мажбур бўлган. Бунинг ортидан ўша пайтда Арманистондаги мухолифатчилар етакчиси, «Елк» партиясининг парламент фракцияси раҳбари Никол Пашинян мамлакат бош вазирлигига номзод сифатида рўйхатдан ўтказилган, кейинроқ бош вазир этиб тайинланган.

Никол Пашинян 2018 йилнинг октябрь ойида мамлакатда навбатдан ташқари парламент сайловлари ўтказилишига эришиш мақсадида истеъфога чиқди ва бош вазири вазифасини бажарувчи сифатида парламентни тарқатиб юборди. 2018 йилнинг декабрь ойида бўлиб ўтган парламент сайловида Пашиняннинг партияси ғалаба қозонган.