Germaniyada aholini koronavirusga qarshi emlash boshlandi. Birinchi bo‘lib Saksoniya-Angalt o‘lkasidagi Xalbershtadtda joylashgan qariyalar uyida yashovchi 101 yoshli ayol vaksina oldi, deb yozadi “RBK” Bild nashriga tayanib.
Qariyalar uyidagi 59 qariyadan 40 nafari, shuningdek, markazning o‘n nafar xodimi va boshqaruvchi direktori ham emlangan.
Gap BioNTech va Pfizer tomonidan ishlab chiqilgan vaksina haqida bormoqda. Germaniya hukumati rejasiga muvofiq, ommaviy vaksinatsiya 27-dekabr kuni boshlanadi. Saksoniya-Angalt o‘lkasiga 26-dekabr kuni ertalab 9,7 ming doza yetkazildi, ular tumanlar va shahar okruglariga tarqatildi.
Birinchi navbatda 80 yoshdan oshgan fuqarolar, qariyalar uylari xodimlari, shuningdek, tibbiyot xodimlari — ambulator xizmatlar, intensiv davolash va shoshilinch yordam bo‘limlari xodimlari emlanadi.
“Yil oxirigacha federal o‘lkalarga 1,3 million doza vaksina yetkazib beriladi”, — dedi Germaniya sog‘liqni saqlash vaziri Yens Shpan.
27-dekabr kuni Yevroittifoqning boshqa mamlakatlarida ham vaksinatsiya boshlanadi. Yevropa mamlakatlariga jami bo‘lib 4,2 millionga yaqin dozada vaksina yetkaziladi.
Izoh (0)