Paragvay terma jamoasining afsonaviy darvozaboni Xose Luis Chilavert mamlakat prezidentligiga o‘z nomzodini qo‘yadi.
Chilavert Twitter’dagi sahifasida saylovoldi bannerini namoyish qildi. “Paragvaylik bo‘lganimdan g‘ururlanaman. Chila — prezident-2023”, — deb yoziladi bannerda.
Paragvayning ayni damdagi prezidenti Mario Abdo Benites hisoblanadi. U 2018-yilning avgustida saylangan va 2023-yilda prezidentlik muddati tugaydi. Shu tariqa afsonaviy posbon siyosiy maydonga qadam qo‘yadigan bo‘ldi.
Chilavert “Veles” klubi safida o‘n yildan ortiq vaqtda faoliyat yuritgan. U jamoa bilan Argentina chempionligi, Libertadores Kubogi, Mintaqalararo Kubok va boshqa sovrinlarni qo‘lga kiritgan. Darvozabon shuningdek, Paragvayning “Guarani”, Argentinaning “San-Lorenso”, Ispaniyaning “Saragosa”, Fransiyaning “Strasburg” va Urugvayning “Penyarol” klublarida harakat qilgan. Chilavert 2005-yilda futbolchilik faoliyatini yakunlagan. Chilavert boshqa darvozabonlar orasida to‘purarligi bilan ajralib turadi. U faoliyati davomida jarima zarbalari va penaltilardan 62 ta gol urishga muvaffaq bo‘lgan.
Xose Luis Paragvay terma jamoasi 1989—2003-yillar mobaynida 74 o‘yin o‘tkazib, 8 ta gol urgan. U terma jamoa safida gol urish borasida darvozabonlar orasida rekordchi hisoblanadi. Shuningdek, bir o‘yinda het-trik qayd etgan tarixdagi yagona darvozabon sanaladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)