Афсонавий дарвозабон Хосе Луис Чилаверт Парагвай президентлигига ўз номзодини қўяди

Парагвай терма жамоасининг афсонавий дарвозабони Хосе Луис Чилаверт мамлакат президентлигига ўз номзодини қўяди.

Чилаверт Twitter’даги саҳифасида сайловолди баннерини намойиш қилди. «Парагвайлик бўлганимдан ғурурланаман. Чила — президент-2023», — деб ёзилади баннерда.

Парагвайнинг айни дамдаги президенти Марио Абдо Бенитес ҳисобланади. У 2018 йилнинг августида сайланган ва 2023 йилда президентлик муддати тугайди. Шу тариқа афсонавий посбон сиёсий майдонга қадам қўядиган бўлди.

Чилаверт «Велес» клуби сафида ўн йилдан ортиқ вақтда фаолият юритган. У жамоа билан Аргентина чемпионлиги, Либертадорес Кубоги, Минтақалараро Кубок ва бошқа совринларни қўлга киритган. Дарвозабон шунингдек, Парагвайнинг «Гуарани», Аргентинанинг «Сан-Лоренцо», Испаниянинг «Сарагоса», Франциянинг «Страсбург» ва Уругвайнинг «Пенярол» клубларида ҳаракат қилган. Чилаверт 2005 йилда футболчилик фаолиятини якунлаган. Чилаверт бошқа дарвозабонлар орасида тўпурарлиги билан ажралиб туради. У фаолияти давомида жарима зарбалари ва пенальтилардан 62 та гол уришга муваффақ бўлган.

Хосе Луис Парагвай терма жамоаси 1989—2003 йиллар мобайнида 74 ўйин ўтказиб, 8 та гол урган. У терма жамоа сафида гол уриш борасида дарвозабонлар орасида рекордчи ҳисобланади. Шунингдек, бир ўйинда ҳет-трик қайд этган тарихдаги ягона дарвозабон саналади.