Futbol bo‘yicha Indoneziya va Peru mezbonligida o‘tishi kerak bo‘lgan U-20 va U-17 Jahon chempionatlari bekor qilindi. Bu haqda FIFA rasmiy saytida ma’lum qilindi.
Koronavirus bilan bog‘liq vaziyat yaxshilanmagani bois FIFA shu qarorga kelgan.
Mazkur qaror o‘z navbatida O‘zbekistonda o‘tishi kerak bo‘lgan U-20 Osiyo chempionati musobaqasining bekor bo‘lishiga olib kelishi mumkin. Ushbu musobaqa Indoneziyada o‘tadigan Jahon chempionatiga saralash vazifasini o‘tashi kerak edi. OFK yaqin orada bu borada qaror chiqarishi kutilmoqda.
Eslatib o‘tamiz, futbol bo‘yicha yoshlar o‘rtasidagi Osiyo chempionati mezbonligi O‘zbekistonga topshirilgandi. Musobaqa avvaliga oktabr oyida o‘tishi belgilangan, biroq koronavirus sabab 2021-yilning mart oyiga qoldirilgandi.
Temur Kapadze qo‘l ostidagi jamoa “A” guruhida Eron, Indoneziya va Kamboja jamoalari bilan bir guruhdan joy olgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)