Қонунчилик палатаси спикерининг биринчи ўринбосари Акмал Саидов 23 декабрь куни Президент Шавкат Мирзиёевнинг Олий Мажлис палаталарига қилган мурожаати бўйича бажарилган ишлар юзасидан маълумот берди. Матбуот анжумани якунида Акмал Саидов Ўзбекистонда сиёсий мухолифат йўқлигига қонун ёки парламент айбдор эмаслигини айтиб, сиёсий партиялар ўзининг мухолифатлик ҳуқуқларидан тўла фойдаланмаётганини танқид қилиб ўтган, деб хабар беради «Kun.uz».
Ўзбекистон парламентида мухолифат партиялар йўқлиги бўйича берилган саволга Акмал Саидов мамлакат қонунчилигида «мухолифат» тушунчаси борлигини таъкидлаб ўтган.
«Бу тушунча 2007 йилда қабул қилинган конституциявий қонунда бор эди. Биз шу йили ‘Давлат бошқарувини янгилаш ва янада демократлаштириш ҳамда мамлакатни модернизация қилишда сиёсий партияларнинг ролини кучайтириш тўғрисида’ги конституциявий қонунни қабул қилганмиз. Қонун ҳали ҳаётда тўлиқ ўз аксини топгани йўқ. Жуда кам давлатларнинг қонунчилигида мухолифат тушунчаси бор. Биз қонунда тушунчалар берганмиз ва унда мухолифатнинг ҳуқуқлари ҳам санаб ўтилган. Бу ҳуқуқлардан сиёсий партияларнинг фракциялари фойдаландими, денгчи. Йўқ. Фойдалангани йўқ. Бунинг учун қонун ёки парламент айбдор эмас», – дейди Акмал Саидов.
«Мухолифат. Бу кимга нисбатан мухолифат? Бизда кўп йиллар бир фикр сингдирилди. Унга кўра, партия фракциялари бир-бирига мухолифат бўлиши керакмиш. Йўқ, у ҳукуматга нисбатан бўлиши керак. Лекин, афсуски, бизда партия аъзоси бўлган ҳукумат раисига шу партия аъзоларининг ўзи қарши чиқади. Мен буни тушунмайман. Қани бу ерда партиявий интизом? Ўйлашимча, Президент мутлақ ҳақ. Қонунда ёзиб қўйиш дегани ҳали иш бажарилди, дегани эмас.
Охирги тўрт йилда шаклланган эркин овоз, фикрни эркин айтиш мухолифатнинг илк куртаклари. Эндиликда бўлажак вазирлар ўз дастурларида нима қилиши, режаларини айтиши керак. Энди бошланяпти. Мен ҳали тўлиқ қониқаётганим йўқ.
Бизда мухолифат учун биринчи босқич – фаоллик ортяпти. Бу яхши. Энди шу жараёнда сиёсий маданият ҳам ошиши керак. Партиялар ҳам жонланиши керак. Масалан, уларнинг ўтган сайловлардаги фаолликлари менга ёқди. Мен юз фоиз ишонаман, бизда мухолифат ҳам шаклланади, мухолифат ҳам бўлади. Ҳақиқат баҳсларда туғилади. Мана шу кунларга, албатта, етамиз», – дейди Қонунчилик палатаси спикерининг биринчи ўринбосари.
Аввалроқ Акмал Саидов Конституцияга ўзгартиш киритиш масаласидаги баҳсларга муносабат билдириб, бу масалада Қонунчилик палатаси ҳаммасини тўғри бажарган деб ҳисоблашини маълум қилганди.
Эслатиб ўтамиз, Шавкат Мирзиёев 2019 йилнинг декабрь охирларида ал-Хоразмий мактабида ёшлар билан учрашувдаги чиқишида сиёсий мухолифат ҳақида ҳам тўхталиб ўтган эди. Президент мухолифатга қарши эмаслигини, лекин у шу ерда шаклланиши кераклигини таъкидлаган.
Изоҳ (0)