Shavkat Mirziyoyev: Parlamentda sog‘lom raqobat bo‘lishi kerak. Muxolifat qo‘rqmasin

Oliy Majlis Qonunchilik palatasining saylovdan keyingi birinchi majlisida so‘zga chiqqan Prezident Shavkat Mirziyoyev parlament haqida fikr bildirdi. Bu haqda “Daryo” muxbiri Mirolim Isajonov xabar berdi.

O‘ylanglar, biz og‘ir, tahlikali zamonda yashayapmiz. Har kunimizdan to‘g‘ri xulosa chiqarish kerak bo‘lgan zamonda yashayapmiz. Yon-atrofimizda bo‘layotgan voqealar — kichkina masalalar emas. Qanchalar og‘ir bo‘lmasin, O‘zbekistonning ertaga yaxshi bo‘lishini xohlayotganlardan ko‘ra xohlamayotganlar ko‘pligi, tashqaridan hech kim kelib, bizga hech balo qilib bermasligini ko‘z oldingizga keltiring. Sizlar endi kichkina odam emassizlar.

Deputatning qalbi, vijdoni uyg‘oq bo‘lsa, vazirlar ham, hukumat ham, parlament ham uyg‘oq bo‘ladi. Mana shuni yozib olinglar.

Uyg‘oq degani — intiluvchan, tirishqoq, befarq bo‘lmagan odam. Agar deputat shunday bo‘lsa, yana takrorlayman, vazirlar ham, hukumat ham, parlament ham uyg‘oq bo‘ladi. Butun jamiyatimiz uyg‘oq bo‘ladi. Bugun biz hamma sohada izlanish va o‘rganishdamiz. Takror va takror aytaman — deputat bo‘lishga hali hammamiz ham tayyor emasmiz. Tayyor bo‘lishimiz uchun, izlanishimiz, uyg‘onishimiz, yana bir bora o‘qishimiz kerak.

Izlanib yashayotgan, o‘z maqsadi sari izchil borayotgan inson va jamiyat, albatta, ijobiy natija va yutuqlarga erisha oladi. Hozirgi kunda O‘zbekiston taraqqiyotining yangi bosqichida oldimizda o‘ta dolzarb va murakkab vazifalar turibdi. Juda murakkab vazifalar turibdi. Hali “ura-ura” deb qarsak chalish uchun ko‘p yillar davomida mashaqqatli, matonatli, sabr-toqatli mehnatimiz talab etiladi. Ularni muvaffaqiyatli hal etish uchun, avvalo, qonun ijodkorligi sohasida ishni butunlay yangicha tashkil etishimiz zarur. Bu borada ayniqsa quyidagi masalalarga alohida e’tibor qaratish lozim.

Birinchidan, quyi palata har bir qonun loyihasi bo‘yicha xolis bahs-munozara va tortishuvlar makoniga, turli ijtimoiy manfaatlar o‘rtasidagi kurash maydoniga, chinakam demokratiya maktabiga aylanishi zarur. O‘tgan besh yil davomida palata faoliyati sezilarli darajada jonlanib, 540 ta yoki 2010—2014-yillardagiga nisbatan ikki barobar ko‘p qonun loyihasi ko‘rib chiqildi. 2015-yilda qabul qilingan qonunlarning bor-yo‘g‘i 11 tasini yaxlit va yangi qonunlar tashkil etgan bo‘lsa, 2019-yilda bu ko‘rsatkich uch barobar oshib, 35 taga yetdi.

Shuni alohida ta’kidlash kerakki, bir sohaga taaluqli ijtimoiy munosabatlarni tartibga soladigan bir nechta qonunlar o‘rniga yagona kodeks qabul qilish amaliyoti qaror topmoqda. Bu juda yaxshi. Jumladan, Fuqarolik protsessual kodeksi, Iqtisodiy protsessual kodeksi, Ma’muriy sud ishlarini yuritish to‘g‘risidagi kodeks, Saylov kodeksi kabi muhim hujjatlar qabul qilindi. Shuningdek, o‘tgan ikki yilda to‘g‘ridan-to‘g‘ri amal qiladigan qonunlar qabul qilinishi boshlandi. Masalan, “To‘lovlar va to‘lov tizimlari to‘g‘risida”gi, “Investitsiya va investitsiya faoliyati to‘g‘risida”gi qonunlarda havolaki normalar o‘rniga to‘g‘ridan-to‘g‘ri ishlaydigan qoidalar belgilandi.

Ayni vaqtda hayotning o‘zi O‘zbekistonning jadal taraqqiyoti bu boradagi faoliyatimizni yangi sifat bosqichiga olib chiqishni talab etmoqda. Hayotning o‘zi talab qilmoqda. Yangi bosqichga, yangi sifatga ko‘tarilishimiz kerak. Jahondagi ilg‘or tajribalari asosida partiyalar o‘z siyosiy manfaatlari, o‘z elektrorati manfaatlarini ifoda etadigan qonunlar qabul qilish uchun parlamentda qizg‘in bahs olib borishlari kerak. Buning uchun parlamentda ko‘pchilikni tashkil etadigan partiya va unga muxolifatda bo‘lgan partiyalar o‘rtasida sog‘lom raqobat bo‘lishi ham shart. Aks holda raqobat bo‘lmaydi. Qo‘rqmanglar, muxolifat. O‘rganinglar shunga.

Kimdir o‘z taklifini aytsa, undan qo‘rqib, “unday bo‘libdi, o‘zgaribdi, oyog‘i yerdan uzilibdi”, deb. Xato qilgan bo‘lsa ham, u o‘z fikrini aytadi. To‘g‘rilanglar, chiqib, qonuniy asoslab beringlar, “siz noto‘g‘ri aytyapsiz, mana bu bandi bunday, unisiga to‘g‘ri kelmaydi, men saylovchilarim bilan o‘zim gaplashdim”, deb aytinglar. Lekin bu gaplarni aytish uchun kechqurun uyga borib televizor emas, kitob o‘qish kerak. Beshta savol berish uchun beshta kitob o‘qishingiz kerak. Mana hayotingizda qanday mas’uliyatli jarayon boshlanyapti. Bu kichkina masalalar emas. Sog‘lom raqobat tashkil qilmasalaring, kechagi saylovga bergan bahoni butun 825 nafar kuzatuvchi olti oyda, bir yilda sizlarning ishingizga qarab, O‘zbekistonga baho beradi.

Shavkat Mirziyoyev, O‘zbekiston Prezidenti