Buyuk Britaniya oziq-ovqat yetishmovchiligiga tayyorlanmoqda. Agar Fransiya koronavirusning yangi turining tarqalishini to‘xtatish uchun Britaniya bilan yuk va yo‘lovchi tashishga taqiq qo‘ysa, ishlab chiqaruvchilar faoliyati to‘xtashi mumkin. Bu haqda “Interfaks” ma’lum qildi.

Fransiya hukumatining 20-dekabr kuni kechqurun e’lon qilgan qarori bilan kuniga 10 mingtagacha yuk mashinasini qabul qiladigan Duvr va Kale kabi portlar o‘rtasidagi savdo-sotiq to‘xtadi. Buyuk Britaniya va Fransiyani bog‘laydigan Yevrotunnelning operatori ham barcha turdagi yuk va yo‘lovchi tashishni to‘xtatdi.

Fransiya Buyuk Britaniya bilan chegarasini 48 soatga yopdi va sayohat taqiqi Buyuk Britaniya vaqti bilan 22-dekabr kuni 23:00 da tugaydi.

Shuningdek, Nyu-York gubernatori Endryu Kuomo aviakompaniyalarni Buyuk Britaniyadan kelayotgan samolyotga chiqishdan oldin yo‘lovchilarni koronavirusga tekshirishga chaqirdi. British Airways va Delta Air Lines ushbu tadbirlarga allaqachon rozi bo‘lgan.

Sky News xabar berishicha, Buyuk Britaniya Fransiya rasmiylari bilan yuk tashishni tiklash uchun yuk mashinalari haydovchilarini ommaviy testdan o‘tkazish imkoniyatini muhokama qilmoqda. 21-dekabr kuni Pas-de-Kale shahridan Londonga yo‘l oladigan 900 dan ortiq yuk mashinasi to‘planib qolgan.

Ta’minot bilan bog‘liq muammolar

“Yuk tashishdagi cheklov Rojdestvo bayrami fonida yangi mahsulotlar yetishmovchiligiga olib kelishi mumkin”, – deydi Yan Rayt, Buyuk Britaniyada joylashgan Food & Drink Federation savdo tashkiloti bosh ijrochi direktori. “Yevropalik yuk mashinalari haydovchilari, agar haqiqatan ham taqiq qo‘yilishidan qo‘rqsa, Buyuk Britaniyaga borishni xohlamaydi”, – deya iqtibos keltirgan The Wall Street Journal.

Buyuk Britaniyaning ikkinchi yirik supermarketlari tarmog‘i bo‘lgan J Sainsbury PLC, agar vaziyat hal etilmasa, yaqin kunlarda do‘konlarida ba’zi meva va sabzavotlar yetishmovchiligi kuzatilishi mumkinligini aytdi.

Mamlakatdagi boshqa kompaniyalar esa Yevropadagi xaridorlarga mahsulot yetkazib berolmaymiz, deya xavotir bildirmoqda.

Britaniyaning Engineering and Machinery Alliance savdo tashkiloti rahbari Jek Semplning aytishicha, ko‘plab ishlab chiqaruvchilar zaxiralarga ega, ammo ta’minot zanjirlari Yevropa bilan shu qadar bog‘lanib ketganki, hozirgi vaziyat xavotirlanishga yetarlicha arziydi.

Koronavirusning yangi shtammi

Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mett Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfliroq emas.

Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Hozirda tashkilot bu shtammni o‘rganmoqda.

Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi. Virusning yangi varianti hozirgi vaksinalar hosil qiladigan immunitetdan kuchliroq bo‘lishi mumkin, degan taxminlar uchun hozircha biror-bir asos yo‘q. Buyuk Britaniya 8-dekabr kuni G‘arb mamlakatlari orasida birinchilardan bo‘lib koronavirusga qarshi Pfizer va BioNTech kompaniyalari tomonidan ishlab chiqilgan dori vositasi bilan ommaviy vaksinatsiya qilishni boshlagan edi.

Yevropaning bir qator mamlakatlari — Niderlandiya, Belgiya, Avstriya va Italiya kabilar Buyuk Britaniya bilan aviaqatnovlarni to‘xtatishini e’lon qilib ulgurdi. Irlandiya, Fransiya va Germaniya, shuningdek, Isroil ham shunday qaror qabul qilish masalasini ko‘rib chiqmoqda. Bild nashri ma’lumotlariga ko‘ra, Germaniya kansleri Angela Merkel Yevropa Ittifoqidagi hamkasblari bilan Buyuk Britaniyadan Yevroittifoqqa parvozlarni 20-dekabr oqshomidan to 2021-yil 6-yanvarigacha muvofiqlashtirilgan holda taqiqlash bo‘yicha kelishishni rejalashtirmoqda. Bundan tashqari, Yevropa Ittifoqi va JAR o‘rtasidagi aviaqatnovlar cheklanishi, Buyuk Britaniya bilan temiryo‘l va parom aloqasi ham to‘xtatilishi mumkin.

Shuningdek, yangi shtamm sabab Saudiya Arabistoni, Rossiya va 20 dan ortiq mamlakat aviaqatnovlarni chekladi. Shu jumladan, O‘zbekiston ham yetti davlat bilan aviareyslarni to‘xtatdi.