Sobyanin Moskvadagi shifokorlarning yarmidan ko‘pi COVID-19’ga chalinib chiqqanini aytdi

Moskva shifokorlarining yarmidan ko‘pi allaqachon koronavirus bilan kasallanib sog‘aygan. Bu haqda shahar meri Sergey Sobyanin ma’lum qildi, deb xabar bermoqda Meduza, “TASS”ga tayanib.

“Moskvadagi barcha shifokorlarning yarmi koronavirusning og‘ir yoki simptomsiz ko‘rinishida kasallanib sog‘aydi, desam xato qilmagan bo‘laman”, — degan u.

Moskva meri va hukumati matbuot xizmatining “Interfaks”ga xabar berishicha, koronavirus bilan og‘rigan bemorlarga yordam ko‘rsatishga 69 mingdan ortiq tibbiyot xodimlari, xususan, shifokorlar, o‘rta va kichik tibbiyot xodimlari, hamshiralar va tez yordam haydovchilari jalb etilgan.

Federal tezkor shtab ma’lumotlariga ko‘ra, Moskvada pandemiya boshlanganidan beri 743 mingdan ortiq kishi COVID-19’ga chalingani aniqlangan. Ularning 572 mingdan ortig‘i sog‘aygan, 10 469 nafari vafot etgan.

Avvalroq Sergey Sobyanin shahar aholisining qanchasi koronavirusga chalinib chiqqanini ma’lum qilgandi. Shuningdek, shahar aholisining 7 mln nafari COVID-19’ga qarshi emlanishi kerakligini aytgan.

Moskvada koronavirus infeksiyasi tarqalishi tufayli joriy qilingan bir qator cheklov choralari 2021-yil 15-yanvargacha uzaytirilgan.