Rossiya prezidenti Vladimir Putin sobiq prezidentlarga umrbod senator bo‘lish imkonini beradigan qonunni imzoladi, deb xabar bermoqda Meduza.
Qonunga ko‘ra, vakolatlari yangi qonun kuchga kirgunga qadar tugatilgan davlat rahbari istalgan vaqtda Federatsiya Kengashiga ariza bilan murojaat qilishi mumkin, deb yozmoqda “RBK”. Agar prezidentning vakolatlari hujjat imzolanganidan keyin tugagan bo‘lsa, u 3 oy ichida senator maqomini olishi mumkin.
Shuningdek, yangi hujjat prezidentga 30 nafar senatorni tayinlash huquqini beradi, ulardan yetti nafari davlat va jamoat faoliyati sohasida ulkan yutuqlarga ega bo‘lsa, umrbod a’zolik olishlari mumkin.
Sobiq prezident umrbod senator bo‘lmoqchiligi to‘g‘risida yozma ravishda xabardor qilishi lozim. Federatsiya Kengashida umrbod qolish huquqidan faqat bir marta foydalanish mumkin. Sobiq prezident umrbod senator bo‘lish huquqidan voz kechishi ham mumkin.
Avvalroq Rossiya Davlat dumasi deputatlari mamlakat sobiq prezidentlarining daxlsizligini kafolatlovchi qonunni uchinchi o‘qishda qabul qilgani haqida xabar berilgan edi. Qonunga ko‘ra, sobiq prezident jinoiy yoki ma’muriy javobgarlikka tortilmasligi, uni hibsda ushlab turish, so‘roq qilish, tintuv o‘tkazish kabi choralarni qo‘llamaslik kafolatlanadi.
Izoh (0)