Saudiya Arabistoni koronavirusning yangi shtammi tufayli chegaralarni yopdi
Saudiya Arabistoni bir qator mamlakatlarda yangi koronavirus shtammi aniqlangandan so‘ng chegaralarni yopdi va xalqaro parvozlarni to‘xtatdi, deya xabar qilmoqda “RBK”.
Yangi cheklovlar ushbu virusning xususiyati haqidagi ma’lumotlar aniq bo‘lgunga qadar, hozircha bir hafta mobaynida amal qiladi. Vaziyatga qarab bu muddat uzaytirilishi mumkin.
Qayd etilishicha, Saudiya Arabistoni hukumati quyidagi cheklovlarni joriy qildi:
- xalqaro parvozlar to‘xtatiladi, qirollikka xorijdan allaqachon yetib kelgan reyslar mamlakatni tark etishi mumkin;
- quruqlik va dengiz chegaralari vaqtincha yopiladi;
- Yevropa mamlakatlaridan yoki koronavirusning yangi shtammi aniqlangan har qanday davlatdan qaytib kelgan fuqarolar ikki hafta davomida o‘zini izolyatsiyalashi va har besh kunda bir marta COVID-19 testini topshirishi kerak;
- so‘nggi uch oy ichida Yevropadan yoki yangi koronavirus turi paydo bo‘lgan mamlakatdan qaytib kelganlar uchun test topshirish ham majburiydir.
Eslatib o‘tamiz, Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mett Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq lekin undan xavfliroq emas.
Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Hozirda tashkilot bu shtammi o‘rganmoqda.
Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi. Virusning yangi varianti hozirgi vaksinalar hosil qiladigan immunitetdan kuchliroq bo‘lishi mumkin, degan taxminlar uchun hozircha biror bir asos yo‘q. Buyuk Britaniya 8-dekabr kuni G‘arb mamlakatlari orasida birinchilardan bo‘lib koronavirusga qarshi Pfizer va BioNTech kompaniyalari tomonidan ishlab chiqilgan dori vositasi bilan ommaviy vaksinatsiya qilishni boshlagan edi.
Yevropaning bir qator mamlakatlari — Niderlandiya, Belgiya, Avstriya va Italiya kabilar Buyuk Britaniya bilan aviaqatnovlarni to‘xtatishini e’lon qilib ulgurdi. Irlandiya, Fransiya va Germaniya, shuningdek, Isroil ham shunday qaror qabul qilish masalasini ko‘rib chiqmoqda. Bild nashri ma’lumotlariga ko‘ra, Germaniya kansleri Angela Merkel Yevropa Ittifoqidagi hamkasblari bilan Buyuk Britaniyadan Yevroittifoqqa parvozlarni 20-dekabr oqshomidan to 2021-yil 6-yanvarigacha muvofiqlashtirilgan holda taqiqlash bo‘yicha kelishishni rejalashtirmoqda. Bundan tashqari, Yevropa Ittifoqi va JAR o‘rtasidagi aviaqatnovlar cheklanishi, Buyuk Britaniya bilan temiryo‘l va parom aloqasi ham to‘xtatilishi mumkin, deya yozmoqda Meduza.
