Tayvanda 21-dekabr kuni bir necha oy ichida koronavirus bilan bog‘liq birinchi holat qayd etildi, deb xabar bermoqda Reuters’ga tayanib “Kommersant”.

Orol aholisi orasida virus 12-apreldan beri, ya’ni 255 kundan beri qayd etilmayotgan edi. Bu koronavirus qayd etilmagan eng uzun davr hisoblandi.

Hukumatning ma’lum qilishicha, koronavirus 30 yoshli ayolda aniqlangan. Ayol virusni Yangi Zelandiya fuqarosi bo‘lgan uchuvchi do‘stidan yuqtirgan. Uchuvchi noyabr oyi oxirida Filippin va AQShga uchgan, shundan so‘ng Tayvanga qaytib kelgan. Uchuvchiga COVID-19 tashxisi qo‘yilgunga qadar u ayol bilan do‘kon va butiklarda aylanishga ulgurgan.

Shu vaqtda u ayolga koronavirus infeksiyasini yuqtirgan. Shu bilan birga, uchuvchi keyinchalik hukumatdan qiz do‘sti bilan uchrashganini yashirdi, buning uchun u 300 ming Tayvan dollari (10,6 ming dollar) miqdorida jarimaga tortildi.

Taxminan 23 million kishi yashaydigan Tayvanda faqat 770 nafar odamda COVID-19 infeksiyasi qayd etilgan. Ularning deyarli barchasi mamlakatga kelgan sayyohlar hisoblanadi.

Eslatib o‘tamiz, Sobyanin Moskvadagi shifokorlarning yarmidan ko‘pi COVID-19’ga chalinib chiqqanini aytgani, JSST COVID-19’ning yangi shtammi qanchalik xavfliligiga baho bergani hamda dunyoda koronavirus oqibatida vafot etganlar soni 1,7 milliondan oshgani haqida xabar berilgan edi.