Jahongir Ortiqxo‘jayev: “Soliq to‘lovchilar Tashkent City’ga kirganida pul to‘lasa, adolatli bo‘lsa kerak”

Toshkent shahri hokimi Jahongir Ortiqxo‘jayev Tashkent City bog‘iga kirish pullik bo‘lgani yuzasidan munosabat bildirdi, deya xabar bermoqda Rost24.

“Munosabatni (direksiya) ular aytadi. Parklarni saqlab turish uchun boshqacha chora yo‘q. Chunki u yerda shuncha daraxtlar ekilgan, elektr energiya ketadi. Tashkent City qurilishiga ancha xarajat qilingan. Buni saqlab turishning o‘zi qiyin.

Bir oyda saqlab turishga 900 million so‘m, har bitta fontanni otilishiga bir kunda 1 million so‘mdan ko‘p pul ketadi. Bunga budjetdan pul ajratilmaydi. Chunki soliq to‘lovchilar kirsa-kirmasa pul to‘lamaydi-ku. U kirganida pul to‘lasa, o‘shanda adolatli bo‘lsa kerak.

Odamlarda haqli ravishda savol tug‘iladi. “Umuman Tashkent City’ga kirmasam, nimaga men to‘layotgan soliqdan pul beryapsizlar?” deyishi mumkin. Shuning uchun o‘zini o‘zi boqqani hamma joyda eng dolzarb, menimcha”, – dedi Ortiqxo‘jayev.

Avvalroq Toshkent hokimi tiktokerlarga taqiq qo‘yish emas, balki ularni to‘g‘ri yo‘lga yo‘naltirish bo‘yicha ish olib borish kerakligini aytgan edi.