O‘zbekistonning to‘rtta universiteti Sharqiy Yevropa va Markaziy Osiyoning eng yaxshi oliygohlari qatoriga kirdi

QS Quacquarelli Symonds oliy ta’lim sohasidagi analitik agentligi 2021-yildagi Yevropa va Markaziy Osiyodagi rivojlanayotgan mamlakatlarning eng yaxshi universitetlari ro‘yxatini e’lon qildi. Reytingda mintaqaning 400 ta eng yaxshi universiteti, shu jumladan O‘zbekistondagi to‘rtta oliy o‘quv yurtlari mavjud, deya xabar qilmoqda “Gazeta.uz”.

O‘zbekiston nomidan ushbu ro‘yxatga Toshkent irrigatsiya va qishloq xo‘jaligini mexanizatsiyalash muhandislari instituti (birinchi marta 2019-yili reytingga kiritilgan), Mirzo Ulug‘bek nomidagi Milliy universitet, Samarqand davlat universiteti va Toshkent davlat texnika universiteti kiradi.

QS Quacquarelli Symonds reytingni tuzishda 10 ta ko‘rsatkichdan foydalanadi, shu jumladan, akademik obro‘si (30 foiz), ish beruvchilar orasidagi obro‘si (20 foiz), o‘qituvchilar va talabalar sonining nisbati (10 foiz), o‘qituvchi va xodimga to‘g‘ri keladigan nashrlar soni (10 foiz) va boshqalar.

Avvalroq O‘zbekiston Inson kamoloti indeksida ikki pog‘ona yuqorilab, 106-o‘rinni egallagani hamda 2021-yil uchun dunyo universitetlari reytingi e’lon qilingani va unda O‘zbekistondan birorta ham OTM yo‘qligi xabar qilingandi.