O‘zbekistonda 2020-yilning 9 oyida tovarlar bo‘yicha tashqi savdo aylanmasi (oltin va tuzatishlarni hisobga olgan holda) 24,3 milliard dollarni tashkil etdi. Bu ko‘rsatkich 2019-yilning 9 oyida 26,2 milliard dollarga teng bo‘lgan, deya xabar qilmoqda Markaziy bank.
Ma’lum qilinishicha, eksport hajmi 10,8 milliard dollar va import hajmi 13,6 milliard dollarga teng bo‘lgan. Shu munosabat bilan, savdo balansining defitsiti 2,8 milliard dollarni tashkil etdi.
Tovarlar eksporti hajmi 2019-yilning 9 oyiga nisbatan o‘zgarishsiz qolgan. Oltin va gazning eksportdagi ulushi mos ravishda 54 foizni hamda 3 foizni tashkil qildi. Shuningdek, energiya tashuvchi mahsulotlar jahon narxlarining keskin tushishi va asosiy iste’molchilar tomonidan ularga bo‘lgan talabning pasayishi oqibatida gaz eksporti hajmida 2019-yilning 9 oyiga nisbatan 78 foizga kamayish kuzatildi.
Shuningdek, 2020-yilning 9 oyida tovarlar eksportining hajmi (oltin eksportini va tuzatishlarni hisobga olmagan holda) 24 foizga kamaydi. Bu ko‘rsatkich 2019-yilning 9 oyida 17 foizni tashkil qilgan.
Eksportning asosiy qismi qimmatbaho metallar va toshlar (5,9 milliard dollar, 2019 yilning 9 oyida 4,1 milliard dollar), to‘qimachilik mahsulotlari (1,5 milliard dollar, 2019-yilning 9 oyida 1,5 milliard dollar), kelib chiqishi o‘simlik bo‘lgan mahsulotlar (850,1 million dollar, 2019-yilning 9 oyida 1,0 milliard dollar), qimmatbaho bo‘lmagan metallar va buyumlarni (773,9 million dollar, 2019-yilning 9 oyida 827,9 million dollar) tashkil qilgan.
Xomashyo tovarlari (oltin va tabiiy gaz) ulushi 2020-yil 9 oyida jami eksport hajmining 57 foizini tashkil qildi, shundan 54 foizi oltin va 3 foizi tabiiy gazga to‘g‘ri keladi. Bunda tabiiy gaz eksportining umumiy hajmidan 94 foizi Xitoy, 5 foizi Tojikiston va 1 foizi Qirg‘izistonga to‘g‘ri keladi.
Izoh (0)