Jahon banki O‘zbekistondagi islohotlarni qo‘llab-quvvatlashga 500 mln dollar ajratdi

Jahon banki O‘zbekistonga taraqqiyot siyosatini qo‘llab-quvvatlash operatsiyasi doirasida 500 million dollar mablag‘ ajratishni ma’qulladi. Uning maqsadi — ijtimoiy va iqtisodiy islohotlarni shaffof va inklyuziv tarzda ilgari surishdan iborat, deb xabar beradi Jahon banki matbuot xizmati.

Operatsiya doirasida hukumatga COVID-19 pandemiyasining salbiy ijtimoiy-iqtisodiy ta’sirini yumshatish, shuningdek, 2017—2021-yillarda Harakatlar strategiyasida belgilangan islohotlarni amalga oshirish ishlari qo‘llab-quvvatlanadi.

Hukumatning taraqqiyot siyosatini qo‘llab-quvvatlash operatsiyasi bilan o‘tkazadigan asosiy islohotlari qatoridan “propiska” tizimini fuqarolarni yashash joyidagi elektron ro‘yxatga olishga o‘tkazish, davlat tomonidan paxta yetishtirish va uning majburiy savdosiga qo‘yilgan amaliyotdan voz kechish, davlat banklari tomonidan davlat korxonalariga subsidiyalashtirilgan kreditlar ajratishni qisqartirish, pandemiya davrida fuqarolarga ijtimoiy yordam ko‘rsatishni kengaytirish kabi talablar o‘rin olgan.

“Jahon banki tomonidan ma’qullangan Taraqqiyot siyosatini qo‘llab-quvvatlash operatsiyasi 2017-yildan buyon O‘zbekistonda amalga oshirilgan asosiy islohotlarning yutuqlarini mustahkamlashga yordam beradi, shuningdek, turli resurslar va uning iqtisodiyotdagi ishtiroki ustidan davlat nazoratini kamaytirishga qaratilgan yanada murakkab islohotlar uchun mustahkam zamin yaratadi”, — deydi Jahon bankining O‘zbekistondagi vakolatxonasi rahbari Marko Mantovanelli.

Ma’lumot uchun, Jahon banki bugungi kunda butun O‘zbekiston bo‘ylab 25 ta loyihaning amalga oshirilishini qo‘llab-quvvatlamoqda. Uning moliyaviy va texnik yordami makroiqtisodiy islohotlar, qishloq xo‘jaligi, sog‘liqni saqlash, ta’lim, suv va kanalizatsiya, energetika, transport, ijtimoiy himoya, shahar va qishloq infratuzilmasini rivojlantirish kabi sohalarda qo‘llanilib kelyapti.

Esatib o‘tamiz, 2020-yilning oktabr oyida Jahon banki Ijrochi direktorlar kengashi “O‘zbekistonda milliy innovatsion tizimni modernizatsiya qilish” loyihasini amalga oshirish uchun 50 million dollar miqdorida mablag‘ ajratishni ma’qullagan edi.