“O‘zgidromet” xabariga ko‘ra, 18-dekabr, juma kuni respublikaning barcha hududlarida asosan quyoshli ob-havo bo‘ladi. Kunning o‘rtasida havo 5—10 daraja iliqqacha, janubda ba’zi joylarda 13 daraja iliqqacha bo‘ladi. Iliq havo ayrim joylarda shamolning kuchayishi bilan kuzatiladi.
Iliq va asosan quyoshli ob-havo O‘zbekistonning tog‘li hududlarida ham saqlanib turadi, tog‘larda harorat 0—5 daraja iliq atrofida bo‘ladi.
“Ammo dam olish kunlari esa qish yana o‘z huquqlarini talab qiladi. Rossiyaning janubiy hududlaridan sovuq va nam havo massalari kirib kelishi O‘zbekiston bo‘ylab ob-havoning yomonlashishiga olib keladi”, — deyiladi xabarda.
19-dekabr, shanba kuniga o‘tar kechasi respublikaning shimolida qor ko‘rinishidagi biroz yog‘ingarchilik boshlanadi. Barcha joylarda yomg‘ir ko‘rinishidagi yog‘ingarchilik qorga aylanishi mumkin. Ba’zi joylarda shamol 15—20 metr/sekundgacha kuchayadi. Faqat eng chekka sharqda (Andijon, Namangan, Farg‘ona viloyatlari) shanba kuni kun davomida havo bulutli, lekin quruq bo‘lishi kutilmoqda.
20-dekabr, yakshanba kuni g‘arbiy hududlarda yog‘ingarchilik kuzatilmaydi, Toshkent, Samarqand, Jizzax, Sirdaryo, Qashqadaryo viloyatlarida qor ko‘rinishidagi yog‘ingarchilik kunning ikkinchi yarmigacha davom etadi va faqat eng chekka janubda va Farg‘ona vodiysida yog‘ingarchilik bo‘lishi kun davomida saqlanib turadi.
Havo harorati yakshanba kunida 2 daraja sovuq—3 daraja iliq qiymatlarigacha pasayadi.
Izoh (0)