Жаҳонгир Ортиқхўжаев: «Солиқ тўловчилар Tashkent City’га кирганида пул тўласа, адолатли бўлса керак»

Тошкент шаҳри ҳокими Жаҳонгир Ортиқхўжаев Tashkent City боғига кириш пуллик бўлгани юзасидан муносабат билдирди, дея хабар бермоқда Rost24.

«Муносабатни (дирекция) улар айтади. Паркларни сақлаб туриш учун бошқача чора йўқ. Чунки у ерда шунча дарахтлар экилган, электр энергия кетади. Tashkent City қурилишига анча харажат қилинган. Буни сақлаб туришнинг ўзи қийин.

Бир ойда сақлаб туришга 900 миллион сўм, ҳар битта фонтанни отилишига бир кунда 1 миллион сўмдан кўп пул кетади. Бунга бюджетдан пул ажратилмайди. Чунки солиқ тўловчилар кирса-кирмаса пул тўламайди-ку. У кирганида пул тўласа, ўшанда адолатли бўлса керак.

Одамларда ҳақли равишда савол туғилади. «Умуман Tashkent City’га кирмасам, нимага мен тўлаётган солиқдан пул беряпсизлар?» дейиши мумкин. Шунинг учун ўзини ўзи боққани ҳамма жойда энг долзарб, менимча», – деди Ортиқхўжаев.

Аввалроқ Тошкент ҳокими тиктокерларга тақиқ қўйиш эмас, балки уларни тўғри йўлга йўналтириш бўйича иш олиб бориш кераклигини айтган эди.