Koronavirusga qarshi vaksinalarni olish bo‘yicha xalqaro mexanizm COVAX muvaffaqiyatsizlikka uchrasa, past daromadli mamlakatlar kamida 2024-yilgacha vaksinasiz qolishi mumkin. Bu haqda Jahon sog‘liqni saqlash tashkiloti bilan birga COVAX dasturini amalga oshirayotgan Vaksinalar va emlash bo‘yicha xalqaro alyansning ichki hujjatlariga tayanib, Reuters xabar berdi.
Qayd etilishicha, mexanizm allaqachon mablag‘ yetishmasligi muammosiga, yetkazib berishning barbod bo‘lish xavfiga va COVAX ishtirokchilari uchun murakkab kelishuv shartlariga duch kelgan.
“COVAX mexanizmining muvaffaqiyatsizlikka uchrash xavfi yuqori”, — deyiladi alyans boshqaruvi hisobotida. Mazkur hisobot boshqa hujjatlar qatorida alyansning 15—17-dekabr kunlari o‘tkazilayotgan direktorlar kengashida muhokama qilinmoqda. Hujjatda qayd etilishicha, xavfning yuqori darajasi dasturni amalga oshirishning qisqa muddati va zarur tajribaning yetishmasligi bilan bog‘liq.
Alyans tomonidan agentlikka ma’lum qilinishicha, “bunday keng miqyosli dasturga bog‘liq xatarlarni baholamaslik va ularni kamaytirish uchun siyosat va vositalar ishlab chiqmaslik mas’uliyatsizlik bo‘ladi”.
COVAX ishlab chiqarish quvvatlarini shakllantirishni qo‘llab-quvvatlash va markazlashgan xaridlarni amalga oshirish bo‘yicha mexanizm hisoblanadi. Hozirgi paytga qadar mazkur tashabbusga 180 dan ortiq davlat qo‘shilgan. Dastur shartlariga ko‘ra, daromad darajasi yuqori bo‘lgan davlatlar vaksinalar xaridi uchun pul to‘laydi va shu tariqa bu sohadagi moliyalashtiriladigan davlatlarga subsidiya beradi. Rejalarga ko‘ra, mazkur mexanizm doirasida 2021-yilning oxiriga qadar butun dunyo bo‘yicha 2 milliard doza vaksina ishlab chiqarilishi va tenglik asosida taqsimlanishi kerak.
Izoh (0)