Jahon sog‘liqni saqlash tashkiloti Rojdestvo va Yangi yil bayramlari sababi Yevropada 2021-yilning boshida koronavirusning yangi to‘lqini yuzaga kelishi ehtimoli yuqori ekanligidan ogohlantirdi. Bu haqda “Interfaks” xabar berdi.
“2021-yilning dastlabki haftalari va oylarida COVID-19 tarqalishi faollashishining yuqori xavfi mavjud, agar buni muvaffaqiyatli bartaraf etishni istasak, birgalikda ishlashimiz kerak”, — deya ma’lum qilgan tashkilotning Yevropa bo‘linmasi.
Tashkilot tomonidan qayd etilishicha, “mo‘rt ildamlashga” erishilganiga qaramasdan, koronavirus Yevropa mintaqasi bo‘ylab keng miqyosda va intensiv ravishda tarqalishda davom etmoqda.
JSST jamoatchilikni “shaxsiy qarorlar ahamiyatiga past baho bermaslikka” va bayram arafasida qo‘shimcha shaxsiy xavfsizlik choralarini ko‘rishga chaqirgan. Ekspertlar Rojdestvo va Yangi yilni imkon boricha ko‘chada nishonlashni, bayramlar ishtirokchilariga esa niqob taqish va ijtimoiy masofani saqlashni maslahat bermoqda.
Binolar ichidagi bayramlarda esa infeksiya tarqalishini kamaytirishning muhim omili mehmonlar sonini cheklash va havoning yaxshi aylanishini ta’minlash hisoblanadi.
“Niqob taqish hamda do‘stlar va oila davrasida ijtimoiy masofa saqlash g‘alati ko‘rinishi mumkin, biroq bu har kim xavfsiz va sog‘lom holatda bo‘lishi uchun sezilarli xizmat qiladi”, — deyiladi bayonotda.
Izoh (0)